TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Në seancën e sotme gjyqësore ku ish-truproja i Sali Berishës, Izet Haxhiaj kërkoi rihapjen e dosjes “Hajdari” avokati i tij paraqiti një dokument të SHIK-ut të asaj kohe, për të vërtetuar se emri i Izet Haxhisë nuk përmendet mes emrave të vrasësve.
Në dokumentin tre faqësh të siguruar për “BalkanWeb” nga gazetarja Klodiana Lala, përshkruhet e gjithë dinamika e vrasjes së Azem Hajdarit në 12 shtator 1998, përfshirë edhe autorët e krimit, konfliketet me Haklajt dhe ngjarjet e e ndodhura në Tropojë.
Dokumenti është një letër që SHIK ia dërgonte Kryeministrit Pandeli Majko dhe Presidentit Rexhep Meidani, por emri i Izet Haxhisë nuk përmendet mes atyre të vrasësve.
Në dokumentin e SHIK flitet edhe për trafikun e armëve nga Gramshi drejt Tropojës me destinacion Kosovën si dhe përfshirjen e Azem Hajdarit në këtë ngjarje.
“BALKANWEB” SJELL TE PLOTE TEKSTIN E DOKUMENTIT
TRE EMRAT E VRASESVE
Nga disa burime të besueshme informative, të pavarura prej njëri-tjetri dyshohet se, autorët e vrasjes së deputetit Azem Hajdari janë: Fatmir Muharrem Haklaj, Jaho Salih Mulosmani dhe Ferz Kërnaja, që të tre nga rrethi i Tropojës.
NGJARJET E BUJSHME NE TROPOJE
Në këtë dokument thuhet ndër të tjera se origjina e konfliktit mes këtij grupi dhe Azem Hajdarit zë fill me tentativën për vrasje që realizoi deputeti i PS, Gafur Mazreku ndaj Azem Hajdarit më datë 18 shtator 1997.
PD-ja pas kësaj ngjarje kërkoi që të realizonte një miting proteste në Tropojë. Shefi i Komisariatit të Policisë në atë përiudhë Fatmir Haklaj nuk ju dha leje dhe për pasojë krijoi konflikt me të quajturin Fatmir Hoxha, i cili është nga fshati Luzhë i Tropojës, në atë kohë ka qënë oficer i Policisë Kufitare në Shkodër, aktualisht qëndron i mbyllur në shtëpi për motive hasmërie.
Në datë 5 janar 1998 në qafë Luzhë, Tropojë vritet Shkëlqim Haklaj, i vëllai i Fatmir Haklës së bashku me kunatin e këtij të fundit të quajtur Kujtim Demiri. Kjo vrasje u dyshua të ishte bërë nga Haki Hoxha dhe Abdyl Matoshi nga fshati Luzhë, ish-oficer i Policisë në Burrel, të dy të shtyrë nga Azem Hajdari.
Më datën 6 janar 1998 në fshatin Cernice të Tropojës vritet Avdyl Matoshi, Gjin Kolbuçaj nga Bukova e Tropojës dhe Naim Dizdari i cili kish grua motrën e Abdyl Matoshit. Në këtë vrasje Fatmir Haklaj nuk ka marrë pjesë vetë.
Në janar 1998 Fatmir Haklaj vret brenda Komisariatit të Policisë në Tropojë, Shaqir Hoxhën, vëllain e Haki Hoxhës. Menjëherë pas ngjarjes braktis detyrën dhe fshihet në mal. Jaho Sali Mulosmani është daja i Fatmir Haklës, ose më saktë kushëriri i parë i nënës së Fatmirt. Jaho është aktualisht Shef i policisë së Rendit në Tropojë, ku me Fatmirn veç lidhjeve të gjakut e lidhin edhe dyshimet për vrasje.
SI U ORGANIZUA VRASJA E AZEM HAJDARIT
Feriz Kërnaja, pjesëmarrës në vrasjen e Azem Hajdarit ka patur këto motive që e kanë shtyrë: Ferizi është poshtëruar publikisht duke u qëlluar me shuplakë para hotel “Arbëria” nga i quajturi Isif Haxhia. Isufi ka qënë shok i ngushtë me Azem Hajdarin, i arratisur në vitin 1990 për disa grabitje e shkatërrime të mjaft dyqaneve në Tropojë, zbërthyer në hetuesi si agjent i shërbimit jugosllav.
Rreth datës 25 shkurt 1991 Feriz Kënaja vret në mënyrë të hapur në tragetin e Tropjës Isuf Haxhiun, i cili rastësisht mbante të veshur atë ditë pardesynë e Azem Hajdarit.
Në trazirat e muajit Mars 1997 arratiset nga burgu dhe kapet në autostradë me një makinë ku kishte edhe armë, së bashku me djalin e Nehat Kullës me të cilin Ferzi ka qënë edhe shok burgu.
Nga fillimi i muajit gusht 1998, Feriz Kërnaja lirohet nga gjykata e faktit në Tropojë duke u argumentuar vendimin me disa anmisti të njëpasnjëshme nga të cilat kishte përfituar.
Rreth datës 2 Shtator 1998, babai i Fatmir Haklës i quajturMuharrem Haklaj , rreth 67 vje} ka ardhur në Tiranë dhe është takuar me Azem Hajdarin, me qëllim për të bërë pajtimin e gjaqeve. Në bisedë ata kanë debatuar dhe në përfundim pasi nuk kanë rënë dakord, Muharremi i ka thënë se për këtë problem do të kthej përgjigje brenda 10 ditësh.
Sipas informacioneve tona, ditën e ngjarjes pra më 12 shtator 1998, rreth orës 21:00 Azem Hajdari është ftuar me telefon për të biseduar rreth këtij problemi në vendin e kryerjes së krimit.
Azemi ka dalë nga zyra i shoqëruar prej dy badigardëve të tij, Besim Cerja dhe Zenel Neza. Vrasja e tij është bërë nga një “Benz” me targa të Vlorës, por jo me atë numër targe që jep ish Presidenti Sali Berisha. Kjo makinë i është marrë Myftar Culajt , pronar i një lokali tek menca e kinezëve me emrin ”Tarzani” nga grupi i mësipërm. Myftarin pas kryerjes së krimit e kanë marrë në telefon dhe në shkëmbim të makinës i kanë kërkuar që të shkojë në Tropojë për të marrë 30 milion lekë. Myftari i trembur ka ikur në Itali bashkë me vëllanë e tij.
Në vrasjen e Azem Hajdarit ka marrë pjesë edhe një person nga Nikla e Krujës, i njohur si vrasës profesionist dhe po atë datë rreth orës 24:00 është çuar i plagosur në spitalin e Tiranës ku edhe ka vdekur. Në xhep i është gjetur një pasaportë e firmosur nga Fatmir Meta ish-shefi i Komisariatit Tropojë. Për këtë person dyshohet se mund të jetë plagosur rëndë në momentin e përplasjes mes dy grupeve nga Azem Hajdari, ose është vrarë nga grupi i Jaho Mulosmanit, për të humbur gjurmët e krimit.
Ekzekutorët e vrasjes së Azem Hajdarit kanë udhëtuar për tërë natën në drejtim të Tropojës, ku kanë mbërritur rreth orës 05:00 të datës 13 shtator 1998.
Ish- ministri i Rendit Publik, Perikli Teta ka marrë dy herë Tropojën për të verifikuar vendndodhjen e Jaho Mulosmanit, i cili kishte dy ditë që nuk ishte paraqitur në Komisariat me pretekstin se ishte i sëmurë. Në orën 22:00 të datës 12 Shtator 1998 kur në shtëpinë e Jahos shkuan një grup policësh, babai i tij Salih Mulosmani, u tha që ishte brenda në dhomë dhe ata vetë nuk e verifikuan.
Taulant Dedja, përfaqësues i qeverisë për Tropojën, në mëngjesin e datës 13 shtator 1998, rreth orës 7:15 e ka konfirmuar ndodhjen e Jaho Mulosmanit në Tropojë.
Në vendngjarje është ndodhur edhe makina e Fatmir Metës tip “Fuoristradë” e me llampën, sinjalin e policisë. Me këtë makinë Jaho Mulosmani ka qarkulluar në Tiranë dy ditë para ngjarjes dhe atë ditë që u krye vrasja. Pas ngjarjes, Fatmirmi nuk shkoi më në Tropojë dhe aktualisht është në dispozicion të Ministrisë së Rendit Publik.
Në vendngjarje është ndodhur edhe makina e Ismet Haxhisë, Shefi i Qarkullimit Rrugor në Tropojë, vëllai i Izet Haxhisë. Kjo makinë është “Tipo” me targa “Policia 203”. Ismet Haxhia kishte ardhur në Tiranë 2-3 ditë para ngjarjes dhe është larguar prej saj ditën e mërkurë, pra katër ditë pas vrasjes.
Ismet Haxhia ka vëlla dhe Ismaedin Haxhiaj, Ismaedini dhe Halil Haklaj, vëlla i Fatmir Haklajt zhvillonin sëbashku trafik armësh nga Gramshi në Tropojë me objekt Kosovën. Për këtë qëllim ishin lidhur në Gramsh me Rudi Bardhoshin, subjekt i ynë në gjurmim për trafik armësh. Me këtë ofertë ishin përzierë edhe Azem Hajdari e Ahmet Krasniqi, ministër i mbrojtjes i Qeverisë së Kosovës. Rrugën e tretë të ngarkesës me armë nga Gramshi drejt Tropojës, arrestohet nga policia e Gramshit Halil Haklaj dhe Isamedin Haxhiaj. Me ta ndalohet e më pas lirohet edhe pritësi i tyre nga Gramshi, Rudi Bardhoshi i cili sipas informacioneve tona ka biseduar në telefon me Azem Hajdarin e Shaban Meminë dhe ka dhëën informacion për trafikun e armëve. Ky fakt është marrë vesh nga Halili e Ismaedini, të cilët janë liruar nga burgu në datën 4 shtator 1998 dhe ka acaruar më tej situatën mes tyre.
Grupi i vrasësve të Azem Hajdarit dyshohet se është edhe autori i vjedhjes së fundit të Bankës sëTropojës, ku janë vjedhur rreth 600 milion lekë, të cialt i mbajnë në shtëpi si dhe autorë të grabitjes së makinave të OSBE-së, Kryqit të Kuq etj, me të cilat shëtisnin lirisht në Tropojë.
Theksojmë se ky grup në vazhdimësi ka dëshirën për të vrar edhe ish-Presidentin Sali berisha gjë për të cilën ky i fundit ka dijeni.
Nga ana jonë po punohet për të sqaruar, verifikuar e vërtetuar më tej të dhënat që disponojmë./BW/
