TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti i Iranit, Masoud Pezeshkian, deklaroi në Asamblenë e Përgjithshme të OKB-së, që po zhvillohet në Nju Jork, se Irani nuk do të “gjunjëzohet” kurrë pas gati shtatë muajsh lufte me SHBA-në dhe Izraelin, por është i gatshëm për një zgjidhje diplomatike të konfliktit.
Duke iu përgjigjur kërcënimit të presidentit amerikan Donald Trump se do ta “zhdukte” Republikën Islamike nëse nuk arrihet së shpejti një marrëveshje, presidenti iranian theksoi: “Rezistenca e popullit iranian do të intensifikohet përballë sanksioneve, presionit në rritje dhe taktikave gjithnjë e më kërcënuese”.
Sipas BBC, Pezeshkian këmbënguli se çdo marrëveshje duhet të përfshijë përfundimin e bllokadës amerikane, e cila pengon anijet iraniane të përdorin një rrugë të rëndësishme detare në Gjirin Persik.
“Nuk mund të jetë kështu që të gjithë të përfitojnë nga Ngushtica e Hormuzit, ndërsa neve na mohohet qasja”, tha ai.
Nga SHBA-ja nuk pati një koment të menjëhershëm. Delegacioni amerikan u largua nga salla në momentin që Pezeshkian nisi fjalimin e tij.
“Presidenti i SHBA-së na quajti terroristë. Por ne jemi viktimat e terrorizmit”, deklaroi presidenti iranian.
Më pas, ai shfaqi një fotografi të Liderit Suprem të ndjerë të Iranit, Ajatollah Ali Khamenei, i cili u vra në një sulm ndaj rezidencës së tij, kur SHBA-ja dhe Izraeli ndërmorën një sulm të përbashkët më 28 shkurt.
Pezeshkian shfaqi gjithashtu fotografi të disa prej më shumë se 175 civilëve, dy të tretat e të cilëve ishin fëmijë, të cilët sipas autoriteteve iraniane u vranë në sulme me raketa ndaj një shkolle fillore në Minab dhe një kompleksi sportiv në Lamerd, po atë ditë.
SHBA-ja ka mohuar se ka sulmuar Lamerdin dhe ka deklaruar se ende po heton ngjarjet në Minab.
“Populli ynë i pafajshëm ka qenë objektiv i sulmeve frikacake dhe veprimeve agresive kundër vendit tonë. Dhe ne u mbrojtëm me të gjitha forcat tona”, tha Pezeshkian.
Në fjalimin e tij para Asamblesë së Përgjithshme të OKB-së të martën, më 22 shtator, Trump deklaroi se përballej me një “vendim të madh”, ose të negocionte një marrëveshje që do t’u mundësonte iranianëve të rindërtonin vendin e tyre, ose të “zhdukte Republikën Islamike dhe ta bënte këtë shpejt”.
Pezeshkian e cilësoi këtë kërcënim si një “tregues të një mentaliteti frikësimi”.
“Trump duhet ta dijë se rezistenca e popullit iranian vetëm do të intensifikohet përballë sanksioneve, presionit të shtuar dhe taktikave gjithnjë e më kërcënuese. Ne nuk do ta ulim kurrë kokën dhe nuk do të gjunjëzohemi”, tha ai.
Megjithatë, presidenti iranian shtoi se “jemi të gatshëm për dialog, diplomaci dhe negociata, por pa pranuar gjuhën e dhunës”.
Pezeshkian përsëriti gjithashtu se Irani nuk do të heqë dorë nga e drejta për të pasur një program civil të energjisë bërthamore dhe se nuk do të kërkojë zhvillimin e armëve bërthamore.
“Po e themi qartë, jo armëve bërthamore dhe jo kufizimeve ndaj teknologjisë bërthamore paqësore”, deklaroi ai.
Në fjalimin e tij, Trump pretendoi se lufta kishte penguar Iranin të siguronte një bombë bërthamore dhe u kërkoi liderëve iranianë të “heqin dorë nga ambiciet e tyre bërthamore”.
Të martën, ministri i Jashtëm iranian Abbas Araghchi dhe i dërguari amerikan Steve Witkoff zhvilluan bisedime indirekte, me ndërmjetësimin e përfaqësuesve nga Katari, në kuadër të Asamblesë së Përgjithshme të OKB-së në Nju Jork.
Witkoff deklaroi se shpresonte që diskutimet, të parat që prej qershorit, të “rezultonin konstruktive dhe shpresëdhënëse”, duke shtuar se ndërmjetësit do të vijonin punën e tyre.
Megjithatë, zëdhënësi i Ministrisë së Jashtme iraniane, Esmail Baghaei, tha se bisedimet “nuk sollën asgjë të re” dhe se Araghchi përsëriti kushtet e Iranit, përfshirë përfundimin e bllokadës amerikane dhe zhbllokimin e aseteve iraniane të ngrira.
