TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Nga ARTAN SHYTI
Kosova ia doli përsëri. Në dy olimpiada që ka marrë pjesë ka siguruar deri tani tri medalje të arta. Pa dyshim një arritje e jashtëzakonshme jo vetëm sportive, por shumëdimensionale dhe patjetër që të gjithë shqiptarët dhe miqtë e tyre nëpër botë janë gëzuar e lumturuar nga kjo arritje epokale. Nuk kanë munguar edhe urimet.
Në radhën e tyre, politika e Shqipërisë është ndër të parat që ka dërguar urime. Natyrshëm që na takon t’i urojmë sportistët kosovarë për këto medalje. Por, a nuk duhet që bashkë me urimet të dëgjojmë edhe “meaculpa”-n e këtyre shtetarëve tanë?
A nuk duhet që bashkë me urimet të dalin dhe të thonë: “Na falni që kemi 9 olimpiada që nuk marrim medalje. Na falni ju qytetarët e Shqipërisë që nuk jemi të zotët të menaxhojmë sportin e Shqipërisë ashtu siç duhet, por e kemi lënë duke dhënë shpirt. Na falni që e kemi degdisur sportin e Shqipërisë që të jetë më i dobët se ai kosovar, megjithëse ata janë një shtet më i ri, janë më të varfër e më hallexhinj se ne. Na falni që nuk e pranuam Majlinda Kelmendin kur kërkoi të vinte të garonte për Shqipërinë, sepse nuk kishim 30 mijë euro që i donte për trajnim dhe gara”.
Nëse nuk dëgjojmë edhe këto kërkesa faljeje, atëherë urimet për sportin e Kosovës janë një hipokrizi që nuk e meritojmë. Ndaj, ju shtetarët tanë urojeni Kosovën që ngjitet lart, ndërkohë që sporti ynë ka marrë rrokullimën. Bashkë me këto urime shtrëngoni fort edhe karriget që keni uzurpuar… Ti gëzosh medaljet Kosova e Artë! Ndërsa ne i gëzofshin shtetarët tanë!
