TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Mijëra qytetarë kanë dalë në rrugët e Francës për të shtunën e katërt radhazi, duke shprehur pakënaqësinë dhe zemërimin ndaj qeverisë. Forca të shumta policore kanë penguar një tubim të lëvizjes “Jelekët e Verdhë” pranë pallatit presidencial në Paris, ndërsa në Lion është përdorur gaz lotsjellës për shpërndarjen e protestuesve.
Autoritetet kishin parashikuar pjesëmarrjen e deri në 170 mijë protestuesve në të gjithë vendin, përfshirë 60 mijë në Paris. Megjithatë, sipas të dhënave të Ministrisë së Brendshme, deri në orët e para të pasdites së të shtunës ishin regjistruar rreth 7 mijë pjesëmarrës në shkallë kombëtare, një shifër më e ulët krahasuar me të njëjtën orë të javës së kaluar.
Për të parandaluar incidentet, në terren u angazhuan rreth 70 mijë pjesëtarë të forcave të sigurisë. Autoritetet mbeten në gatishmëri, ndërsa kujtimet e trazirave të dhunshme të 17 tetorit janë ende të freskëta, pasi ato konsiderohen ndër më të rëndat që vendi ka përjetuar vitet e fundit.
Në Paris, sindikatat organizuan një marshim nga Sheshi i Republikës drejt Sheshit të Kombit. Ndërkohë, lëvizja “Jelekët e Verdhë” bëri thirrje për një tubim të veçantë në Sheshin Concorde, në një distancë të shkurtër nga pallati presidencial Elize dhe Asambleja Kombëtare Franceze.
Megjithatë, tubimi ishte ndaluar nga autoritetet, të cilat kishin vendosur një numër të madh efektivësh policie për të bllokuar hyrjen në zonë. Rreth 100 persona që tentuan të mblidheshin u rrethuan nga policia, ndërsa dy përfaqësues të lëvizjes u arrestuan.
Tensione u shënuan edhe në Lion, ku policia përdori gaz lotsjellës për të shpërndarë qindra protestues që kishin bllokuar një rrugë në qendër të qytetit, gjatë një tubimi të paautorizuar.
Qasja e forcave të rendit ka shkaktuar reagime, ndërsa janë hapur dhjetëra hetime lidhur me akuzat për përdorim të tepruar të dhunës ndaj protestuesve.
Protestat po ndikojnë edhe në aktivitetin tregtar. Shumë dyqane kanë mbetur të mbyllura ose kanë mbuluar vitrinat me panele druri, nga frika e incidenteve dhe plaçkitjeve të mundshme.
Ndërkohë, qeveria po përpiqet të ulë tensionet, por përballet me hapësira të kufizuara financiare për shkak të nivelit të lartë të borxhit publik.
Kryeministri Sébastien Lecornu pritet të takohet të hënën me përfaqësues të sindikatave dhe organizatave të punëdhënësve. Pagat dhe fuqia blerëse pritet të jenë ndër çështjet kryesore të diskutimit.
Megjithatë, organizatat e studentëve dhe mësuesve kanë njoftuar tashmë një grevë të re për të martën, duke kërkuar më shumë burime dhe financime për arsimin.
Protestat zhvillohen në një periudhë pasigurie të madhe politike për Francën, ndërsa vendi po i afrohet zgjedhjeve presidenciale të vitit 2027.
