TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Rusia i ka ndaluar hyrjen ish-presidentit Barack Obama. Lajmi u bë i ditur nga Ministria e Jashtme ruse. Mësohet se Obama ishte në mesin e 500 qytetarëve amerikanë që do të ndaloheshin si përgjigje ndaj sanksioneve të fundit nga Uashingtoni. Ministria tha gjithashtu se Rusia kishte refuzuar kërkesën e fundit të SHBA për qasje konsullore ndaj gazetarit të Wall Street Journal Evan Gershkovich, i cili u arrestua në mars me dyshimin për spiunazh.
Kjo lëvizje u shkaktua nga refuzimi i SHBA-së muajin e kaluar për t’i dhënë viza mediave që udhëtonin me ministrin e Jashtëm, Sergei Lavrov, në Kombet e Bashkuara, thuhet në një deklaratë.
“Uashingtoni duhet të kishte mësuar shumë kohë më parë se asnjë sulm i vetëm armiqësor ndaj Rusisë nuk do të mbetet i pandëshkuar”, thuhet më tej në deklaratën e ministrisë së jashtme ruse. Më herët të premten, SHBA njoftoi masa ndëshkuese kundër më shumë se 300 objektivave, si një ndëshkim ndaj Rusisë për pushtimin që ka nisur në Ukrainë prej shumë muajsh.
