TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Marrëdhëniet mes Francës dhe Shteteve të Bashkuara të Amerikës janë tensionuar pas një deklarate të ambasadorit amerikan në Paris, Charles Kushner, krushku i Trump, i cili akuzoi Francën për mosveprim të mjaftueshëm ndaj rritjes së antisemitizmit në vend.
Ministria e Jashtme e Francës njoftoi se e ka thirrur zyrtarisht ambasadorin Kushner për një takim sqarues të hënën, duke i cilësuar akuzat e tij si “të papranueshme” dhe një ndërhyrje në punët e brendshme të Francës.
Çfarë tha Kushner?
Në një letër të drejtuar presidentit Emmanuel Macron, Charles Kushner u shpreh se Franca nuk po vepron me vendosmëri kundër antisemitizmit, duke i lidhur qëndrimet franceze për njohjen e shtetit palestinez me një klimë që, sipas tij, “i jep guxim ekstremistëve dhe rrezikon jetën hebraike” në vend.
Letra u publikua të dielën vonë dhe shkaktoi reagim të menjëhershëm në Paris. Ministria franceze e Punëve të Jashtme u shpreh në një deklaratë se akuzat “minojnë partneritetin transatlantik dhe besimin mes aleatëve”.
Reagimi i SHBA
Departamenti Amerikan i Shtetit, nëpërmjet zëdhënësit Tommy Pigott, konfirmoi mbështetjen për ambasadorin Kushner, duke deklaruar se ai është “përfaqësuesi zyrtar i qeverisë amerikane dhe po bën një punë të shkëlqyer” në avancimin e interesave të SHBA në Francë.
Franca: Akuzat janë të pabaza
Ministria franceze theksoi se autoritetet janë “plotësisht të mobilizuara” për të luftuar antisemitizmin, sidomos pas sulmit të Hamasit ndaj Izraelit më 7 tetor 2023, dhe e cilësoi antisemitizmin si “të patolerueshëm”. Sipas saj, Franca hedh poshtë çdo akuzë për mosveprim dhe riafirmon angazhimin e saj të fortë në mbrojtje të komunitetit hebraik.
Kjo përplasje diplomatike vjen pas deklaratave të fundit të Macron, i cili refuzoi akuzat e kryeministrit izraelit Benjamin Netanyahu, se Franca po nxit antisemitizmin me synimin e saj për të njohur shtetin palestinez.
Franca, vend me popullsinë më të madhe hebraike në Evropë (rreth 500.000), ka qenë nën presion të dyanshëm për qëndrimet e saj në konfliktin Izrael-Palestinë.
Nga ana tjetër, ndarjet mes Parisit dhe Uashingtonit për çështje të tjera ndërkombëtare – përfshirë mbështetjen ndaj Ukrainës – kanë filluar të zbuten kohët e fundit, pas një takimi miqësor mes Trump dhe Macron në Shtëpinë e Bardhë.
Kushner paralajmëron Macron, letra që mund të tensionojë raportet SHBA-Francë
Charles Kushner, ambasadori i ri i Shteteve të Bashkuara në Francë, ka thyer heshtjen që nga mbërritja e tij në Paris në fillim të korrikut. E para e tij nismë publike ka potencialin të tensionojë marrëdhëniet mes presidentit francez Emmanuel Macron dhe presidentit amerikan Donald Trump.
Në një letër të datës 25 gusht, e publikuar nga mediat më 24 gusht, Kushner, paralajmëron Macron për rritjen shqetësuese të antisemitizmit në Francë.
“Shkruaj me shqetësim të thellë për rritjen dramatike të antisemitizmit dhe mungesën e veprimeve të mjaftueshme nga qeveria juaj,” thekson Kushner.
Letra vjen pak ditë pas një paralajmërimi të ngjashëm nga kryeministri izraelit Benjamin Netanyahu, i cili kritikoi planet e Francës për të njohur Shtetin e Palestinës në Asamblenë e Përgjithshme të OKB-së. Netanyahu tha se mbështetja për Palestinën “frymëzon urrejtjen ndaj hebrenjve dhe fuqizon Hamasin”.
Kushner është në të njëjtin mendim me Netanyahu-n. Ai thekson se deklaratat publike kundër Izraelit dhe hapja për njohjen e shtetit palestinez “inspirojnë ekstremistët, ushqejnë dhunën dhe rrezikojnë jetën e hebrenjve në Francë”. Ambasadori amerikan nënvizon se “Presidenti Trump dhe ai kanë fëmijë hebrenj dhe nipër hebrenj. E di se si ndihet për antisemitizmin, ashtu si të gjithë amerikanët.”
Kushner, i jep sugjerime të qarta Presidentit Macron: zbatimi i ligjeve kundër urrejtjes, siguria e shkollave, sinagogave dhe bizneseve hebreje, ndëshkimi i sulmuesve dhe heqja e çdo hapësire që i jep legjitimitet Hamasit!
Kjo lëvizje, dhe tonet e letrës, reflektojnë qëndrimin e administratës Trump kundër planeve franceze për njohjen e Shtetit të Palestinës, në një kohë kur diplomacia franceze synon të marrë mbështetjen edhe të vendeve si Mbretëria e Bashkuar, Kanadaja dhe Australia.
