TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjykata Supreme Federale e Brazilit ka pranuar kërkesën e Shqipërisë për ekstradimin e shtetasit shqiptar Ervin Mata, i kërkuar nga autoritetet shqiptare për t’iu nënshtruar procesit penal për trafik ndërkombëtar të lëndëve narkotike.
Sipas vendimit, kërkesa për ekstradim e paraqitur nga Qeveria e Republikës së Shqipërisë ishte e shoqëruar me dokumentet e nevojshme dhe plotësonte kërkesat e përcaktuara nga Ligji brazilian i Migracionit, si dhe parimin e reciprocitetit për raste të ngjashme.
Gjykata braziliane ka konstatuar se veprat penale për të cilat kërkohet ekstradimi i Matës përputhen edhe me veprat penale të parashikuara në legjislacionin brazilian. Po ashtu, sipas vendimit, afati i parashkrimit të ndjekjes penale nuk ka përfunduar.
Në vendim sqarohet se Gjykata Supreme Federale nuk shqyrton në këtë procedurë nëse Mata është apo jo autor i veprave për të cilat akuzohet. Ekstradimi është pranuar në bazë të përmbushjes së kushteve ligjore, ndërsa përgjegjësia penale do të shqyrtohet në procesin përkatës.
Vendimi është dhënë në datën 14 shtator 2026.
Në vitin 2023, Ervin Mata u shpall në kërkim nga SPAK si pjesë e një grupi kriminal me 11 persona, ku përfshihej edhe djali i ish-zyrtarit të policisë, Erzen Breçani. Sipas dosjes hetimore, të cilën në atë kohë Report Tv e siguroi, grupi dyshohet për trafikimin e sasive të mëdha të kokainës nga Amerika Latine drejt Europës. Në veçanti, Mata akuzohet se koordinoi grupin për trafikimin e 250 kilogramëve kokainë, ngarkesë e nisur nga Brazili në aeroportit të Frankfurtit në Gjermani, në fund të shtatorit 2020.
GJKKO caktoi ndaj tij masën e sigurisë “arrest në burg” trafik droge, kryer në kuadër të grupit të strukturuar kriminal, si dhe kryerje e veprave penale nga organizata kriminale, dhe kjo si pjesë e grupit të strukturuar kriminal. Ervin Mata është i njohur për drejtësinë shqiptare edhe pas përplasjes së bujshme me Ervis Martinajn, i zhdukur prej gati 4 vitesh, në një lokal në zonën e ish-Bllokut në Tiranë, në vitin 2018, ku mbeti i vrarë Fabian Gaxha, truproja ish-bosit të lojërave të fatit.
