TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjiganti shtetëror rus i energjisë ka bërë të ditur se do të pezullojë eksportet e gazit natyror në Shell (SHLX) duke filluar nga dita e mërkurë sepse kompania nuk kishte bërë pagesat në rubla.
“Shell Energy Europe Limited ka njoftuar Gazprom Export LLC se nuk ka ndërmend të bëjë pagesa sipas kontratës për furnizimin me gaz në Gjermani në rubla”, tha Gazprom në një deklaratë në llogarinë e saj Telegram.
Gazprom bëri të ditur gjithashtu se Shell do të humbiste deri në 1.2 miliardë metra kub furnizim vjetor me gaz. Por lëvizja e Gazprom ka gjasa të tronditë industrinë gjermane, e cila varet shumë nga gazi i Moskës. Vendi tashmë ka arritur të zvogëlojë pjesën e Rusisë në importet e saj të gazit në 35% nga 55% para fillimit të luftës.
Një zëdhënës i qeverisë gjermane i tha CNN Business se po “monitoronte situatën nga shumë afër”.
“Siguria e furnizimit është e garantuar”, shtoi zëdhënësi. Njoftimi i Gazprom vjen vetëm një ditë pasi tha se do të ndalonte furnizimet me gaz për kompaninë daneze energjetike Ørsted dhe firmën holandeze të tregtimit të gazit GasTerra, dhe disa javë pasi mbylli rubinetat në Poloni, Bullgari dhe Finlandë.
Në mars, presidenti rus Vladimir Putin kërcënoi se do të shkurtonte dërgesat e gazit për vendet “jomiqësore” që refuzuan të paguanin në rubla, në vend të eurove ose dollarëve. Që atëherë, Gazprom u ka ofruar klientëve një zgjidhje; Blerësit mund të bënin pagesa në euro ose dollarë në një llogari në Gazprombank të Rusisë, e cila më pas do t’i konvertonte fondet në rubla dhe do t’i transferonte ato në një llogari të dytë nga e cila do të bëhej pagesa në Rusi. Por shumë kompani evropiane, përfshirë Shell Energy, e refuzuan këtë ofertë. “Shell nuk ka rënë dakord me kushtet e reja të pagesës të përcaktuara nga Gazprom”, tha një zëdhënës i Shell për CNN.
“Ne do të punojmë për të vazhduar furnizimin e klientëve tanë në Evropë përmes portofolit tonë të larmishëm të furnizimit me gaz”, theksoi zëdhënësi i Shell.
GasTerra e Holandës në një deklaratë të ngjashme bëri të ditur të hënën se nuk pajtohet me “kërkesat e pagesave të njëanshme” të Gazprom.
Henning Gloystein, drejtor i Energjisë, Klimës dhe Burimeve në Eurasia Group, i tha CNN Business se mbyllja e fundit nuk përfaqëson një “humbje të madhe të ardhurash” për Gazprom, duke qenë se eksportet në Shell Gjermani përbënin më pak se 1% të eksporteve totale të Rusisë në Bashkimit Evropian vitin e kaluar. “Në të kundërt, firmat evropiane të energjisë që mbështeten shumë më tepër në furnizimin rus… kanë kaluar kryesisht në mekanizmin e ri të pagesave të Gazprom për të mbrojtur operacionet e tyre” shtoi ai.
