TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Bashkimi Evropian pritet të nisë të hënën negociatat zyrtare të anëtarësimit me Ukrainën dhe Moldavinë, pas heqjes së bllokadës së vendosur më parë nga Hungaria.
Qipro, e cila mban aktualisht presidencën e radhës së Këshillit të Bashkimit Evropian, njoftoi dje se shtetet anëtare kanë rënë dakord për një qëndrim të përbashkët lidhur me fazën e parë të negociatave, duke përfunduar kështu përgatitjet e nevojshme.
Presidenti ukrainas, Volodymyr Zelensky, falënderoi partnerët e vendit të tij në BE përmes rrjeteve sociale.
“Ukraina po bën atë që është e nevojshme dhe është e rëndësishme që edhe BE-ja të mbajë fjalën e saj”, shkroi ai.
“Nisja e negociatave përbën një mbështetje të rëndësishme politike dhe morale për shtetin dhe popullin tonë”, theksoi Zelensky.
Edhe presidentja e Moldavisë, Maia Sandu, e përshëndeti vendimin në një postim në X.
“Kemi bërë punën tonë dhe do të vazhdojmë të zbatojmë reformat”, shkroi ajo.
BE-ja i hapi zyrtarisht negociatat e anëtarësimit me Ukrainën dhe Moldavinë në qershor të vitit 2024, por hapja e fazës së parë të bisedimeve me Kievin u bllokua nga vetoja hungareze.
Vetëm pas humbjes në zgjedhje të ish-kryeministrit hungarez, Viktor Orbán, në prill, procesi filloi të ecë përpara.
Kryeministri i ri i Hungarisë, Peter Magyar, njoftoi javën e kaluar se ishte arritur një marrëveshje me Kievin për forcimin e të drejtave të pakicës hungareze në Ukrainë.
Magyar e kishte vendosur këtë marrëveshje si kusht për miratimin e nisjes së negociatave të anëtarësimit të Ukrainës në BE.
