TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti rus Vladimir Putin vlerësoi përpjekjet “energjike” të administratës Trump për të ndalur luftën në Ukrainë dhe la të kuptohej se Moska dhe Uashingtoni mund të arrijnë një marrëveshje për kontrollin e armëve bërthamore gjatë samitit të tyre të premten në Alaskë.
Para se të udhëtojë drejt Alaskës për t’u takuar me presidentin amerikan, Putin kryesoi të enjten një mbledhje me zyrtarë të lartë rusë për t’i informuar mbi gjendjen e negociatave me SHBA-në për Ukrainën.
“Administrata aktuale amerikane… po bën, sipas mendimit tim, përpjekje mjaft energjike dhe të sinqerta për të ndalur armiqësitë, për të ndalur krizën dhe për të arritur marrëveshje që janë me interes për të gjitha palët e përfshira në këtë konflikt,” tha Putin.
Në fjalën e tij të shkurtër, Putin tha se samiti me SHBA-në synon të “krijojë kushte afatgjata për paqe mes vendeve tona, si edhe në Evropë, dhe në botë në tërësi.”
Ai sugjeroi se ky paqëtim më i gjerë mund të arrihet nëse, në “fazat e ardhshme” të bisedimeve me SHBA-në, “arrijmë marrëveshje në fushën e kontrollit mbi armët strategjike sulmuese,” duke iu referuar armëve bërthamore.
SHBA dhe Rusia ranë dakord të kufizonin arsenalet e tyre bërthamore sipas marrëveshjes New START, e cila hyri në fuqi në vitin 2011. Sipas marrëveshjes, të dyja vendet kishin shtatë vite kohë për të përmbushur kufijtë e përcaktuar mbi numrin e armëve bërthamore ndërkontinentale të vendosura që mund të zotërojnë. Megjithatë, traktati skadon në shkurt të vitit 2026.
