TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Banorët nga fshatrat e Njësisë Administrative Thumanë protestuan sot për të tretën herë radhazi pranë nënkalimit të autostradës Thumanë-Kashar, duke bllokuar për rreth një orë qarkullimin.
Shkak i protestës është gjendja e rënduar e rrugës së Gramzës, e cila është dëmtuar nga automjetet që devijojnë nga autostrada.
Banorët akuzojnë mosinteresin e Autoritetit Rrugor Shqiptar (ARRSH) dhe Bashkisë Krujë për investime dhe mirëmbajtjen e kësaj rruge prej rreth 500 metrash, që detyron komunitetin të marrë masa për të tërhequr vëmendjen e institucioneve.
“Këto makinat e mëdha na e kanë dëmtuar, 500 metra rrugës është. Vij prej pune nga Thumana deri në Gramës, dua tre orë të shkoj të shtëpia. 500 metra rrugë është, të na e shtrojnë me asfalt. Të mos kalojnë makinat e tonazhit të rëndë, ose të bëjnë rrethrrotullimin. Erdhën hodhën çakëll për t’i mbyllur sytë njerëzve”, tha njëri prej protestuesve.
“Nuk është hera e parë që po bëhet protesta, nuk po kërkojmë diçka të veçantë, 500 metra rrugë ta shtrojnë se nuk i kushton asnjë. Ky ka qenë asfalt i rregullt, e kanë prishur. Një rrugë 500 metra duam, një ditë punë e kanë. Na premtuan dalje në autostradë, kjo është skandal. Kalojnë makinat e tonazhit të rëndë”, tha një tjetër.
Banorët apeluan drejtpërdrejt tek institucionet shtetërore për të ndërhyrë në rikonstruksionin e rrugëve të dëmtuara në Krujë, një nga zonat më të neglizhuara dhe më pak të investuara nga qeveria.
