TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Kryetari i Partisë Demokratike, Sali Berisha, trajtoi para grupit parlamentar edhe çështjen e Progres Raportit të Komisionit Evropian për vitin 2025 për Shqipërinë, në plotësimin e reformave dhe rekomandimeve për integrimin në BE.
Ai kundërshtoi deklaratat e kryeministrit Edi Rama, që e cilësoi raport të jashtëzakonshëm dhe të shkëlqyer. Berisha tha se ky nuk ishte “raport i shkëlqyer, por i ndryshkur”. Berisha tha se krimi i organizuar ka kapur vendin, drejtësia është në kolaps, parlamenti nuk funksionon dhe skandalet e korrupsionit me zyrtarë të lartë janë zbuluar.
“Çfarë shkëlqimi shikojnë ata, ku e shohin shkëlqimin të dashur qytetarë? Ky është ndryshk. Raport Progresi i Komisionit Evropian është radiografi e plotë, një raport i zi. Zgjedhjet u deformuan, Kuvendi është kapur, drejtësia në kaos, në kolaps, me stok dosjesh e mungesë burimesh, vendimet e Gjykatës Kushtetuese nuk zbatohen.
Ai thotë se Gjykata ruajti pavarësinë. Ku e ka zbatimin e vendimit të Kushtetueses për Olta Xhaçkën? Apo është aksioner me të te pronat që kanë grabitur. Po krimi i organizuar dhe kartelet? Ku është shkëlqimi këtu?”, u shpreh kreu i selisë blu mes të tjerash.
Më tej ai analizoi raportin për situatën e drejtësisë në Shqipëri, duke kujtuar edhe vrasjen e gjyqtarit Astrit Kalaja në sallën e gjyqit.
“Qytetarët shqiptarë nuk kanë një proces ligjor të drejtë. Dosjet kanë mbetur stok, kolaps total. Vetëm çështjet e qeveritarëve shqyrtohen, jo të qytetarëve. Keni rastin e Llagamit merr 3 mln euro me një proces brenda 2-3 viteve. U vra gjyqtari atje, në sallën e gjyqit. Vendi është shndërruar në arenën kryesore të ndërtimeve me miliarda e miliarda të karteleve. Është shndërruar në vendin e krimit të organizuar”, tha kryetari i PD-së.
Në fund Berisha akuzoi se:
“Raporti jo vetëm nuk shkëlqen në asgjë, por nxin në të gjitha. Unë garantoj edhe BE edhe KE se beteja e opozitës do të vazhdojë”.
