TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gazetarët Ola Xama dhe Xhevahir Zhabina, të ftuar në emisionin “Të Paekspozuarit” në MCN TV, folën për hetimet për inceneratorin e Tiranës.
Ndërsa Xama u shpreh se nuk ka asnjë të akuzuar në nivelet e larta drejtuese të politikës në bashkinë e Tiranës dhe qeveri. Zhabina tha se Prokuroria e Posaçme nuk u ka dhënë përgjigje dy çështjeve të rëndësishme, siç janë letra e firmosur nga Veliaj që ka dhënë dakordësinë për të vazhduar inceneratorin, duke marrë kompetencat e Këshillit Bashkiak dhe nëse Ministria e Financave i ka patur paratë për të vazhduar me inceneratorin.
Pjesë nga biseda
Ola Xama: Që prej fillimit të hetimit çështja e inceneratorit u nda në tre pjesë dhe për inceneratorin e Elbasanit dhe Fierit janë duke u përmbyllur hetimet, ndërsa për Tiranën ka katër vite e gjysëm që hetimet vazhdojnë. Kemi komunikim akuze për ish-deputetin Alqi Bllako, ish-ministrin e Mjedisit, Lefter Koka, kemi akuza për disa drejtues të bashkisë së Tiranës dhe në korrik SPAK veproi ndaj disa përfaqësuesve të medias dhe ndaj kompanisë Integrated BVSPV, por asgjë sa i takon nivele të larta drejtuese të politikës, qoftë në bashkinë e Tiranës, qoftë në Ministrinë e Infrastrukturës, Ministrinë Mjedisit, apo në qeveri.
Xhevahir Zhabina: Prokuroria e Posaçme ka disa fraksione sa i përket hetimeve për inceneratorin e Tiranës. Procedimi mëmë është ai 255 dhe ai 255/1 është dërguar tashmë në gjykatë dhe të pandehur për këtë çështje janë 12 persona, ndër ta dy përfaqësuesit e bashkisë së Tiranës, Tualant Tushe dhe Namik Simixhiu që kanë qenë në Komisionin e Vlerësimit të Ofertave dhe mbi ta rëndon akuza e shpërdorimit të detyrës. Kjo çështje është në seancë paraprake dhe nuk dihet nëse do të shkojë për gjykim apo do t’i kthehet prokurorisë për plotësime të mëtejshme, ndërsa sa i përket pjesës tjetër të hetimeve kemi një fraksion tjetër të hetuar nga Prokuroria e Posaçme, ku në dijeninë time janë të pandehur 8-9 persona dhe mbi ta është ngritur akuza e grupit të strukturuar kriminal. Kemi edhe procedimin mëmë që mbahet aty nga prokurori i çështjes Dritan Premçi për të hetuar edhe persona të tjerë të dyshuar që ne i presim, të cilët mund të jenë zyrtarë të lartë që janë marrë me ngritjen e koncesionit të inceneratorit të Tiranës.
Deri tani Prokuroria e Posaçme nuk u ka dhënë përgjigje dy çështjeve; e para ajo letra e famshme e firmosur nga Veliaj që ka dhënë okejn për të vazhduar inceneratorin, duke marrë kompetencat e këshillit bashkiak. Prokuroria ende nuk ka thënë nëse kjo është vepër penale e kryetarit të bashkisë së Tiranës apo jo dhe pjesa e dytë nëse Ministria e Financave në atë periudhë i ka patur ose jo paratë për të vazhduar me inceneratorin. Deri tani nuk dihet nëse SPAK-u do të ketë këllqe për të shkuar më lart, pra që të vendosë nëse shkresa e Veliajt është ligjore apo jo dhe nëse Ministria e Financave i ka patur këto para.
