Meta dorëzohet përballë Ramës, dekreton Lleshajn për Ministër të Brendshëm

Presidenti Ilir Meta e ka dekretuar Sandër Lleshajn si ministër të Brendshëm. Po gjatë ditës së sotme, Presidenti Ilir Meta ka dekretuar lirimin e Sandër Lleshajt nga grada Gjeneral. Kërkesa për lirimin e Lleshajt, ka ardhur vetë nga ky i fundit, i cili kërkonte që të mos ishte më pjesë e ushtrisë që ti hapej rruga për emërimin në postimin Ministrit të Brendshëm. Ky vendim i Presidentit vjen pas propozimit të dytë nga kryeministri Edi Rama për Lleshajn. Herën e parë Meta u shpreh se nuk ‘i ishte krijuar bindja’ për ta dekretuar për ministër dhe në korrespondencën e mëpasme me qeverinë u zbuluan se ngërçi dhe mosdekretimi vinte pikërisht për shkak të statusit aktiv të ushtarakut të Sandër Lleshaj që deri sot mbante gradën gjeneral. Por me sa duket dhe ky moment është tejkaluar dhe tashmë zv.ministri Lleshaj do të marrë detyrën e ministrit të Brendshëm.

DEKRET PËR EMËRIM MINISTRI Në mbështetje të nenit 93 dhe 98, pika 1 të Kushtetutës, me propozim të Kryeministrit nr. 5211 prot., datë 09.11.2018,

Dekretoj: Neni 1 Zoti Sandër Lleshaj, emërohet Ministër i Brendshëm.

Neni 2 Ky dekret hyn në fuqi menjëherë. Nr. Dekreti 10957 Tiranë, më 16.11.2018.

PRESIDENTI I REPUBLIKËS ILIR META