TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
UEFA ka vendosur sanksione financiare dhe masa disiplinore ndaj federatave të futbollit të Kosovës, Kroacisë dhe Serbisë, pas shkeljeve të konstatuara në ndeshjet e Ligës së Kombeve.
Masat përfshijnë gjoba financiare, kufizime në shitjen e biletave dhe, në rastin e Serbisë, zhvillimin e ndeshjes së radhës në shtëpi pa praninë e tifozëve.
Federata e Futbollit e Kosovës është gjobitur me 35 mijë euro. Nga kjo shumë, 15 mijë euro janë vendosur për shfaqjen e një mesazhi të papërshtatshëm për një aktivitet sportiv, ndërsa 20 mijë euro të tjera për sjellje raciste dhe diskriminuese të tifozëve gjatë humbjes 3-1 ndaj Austrisë.
Përveç gjobës financiare, Kosova është ndëshkuar edhe me ndalimin e shitjes së biletave për një ndeshje jashtë fushe në kompeticionet e UEFA-s. Megjithatë, kjo masë është pezulluar për dy vjet dhe do të zbatohet në rast se shkeljet përkatëse përsëriten gjatë kësaj periudhe.
Edhe Kroacia është ndëshkuar për sjelljen e tifozëve të saj. Federata kroate duhet të paguajë 20 mijë euro gjobë pas humbjes 4-1 ndaj Spanjës, për sjellje raciste dhe diskriminuese në tribuna.
Ashtu si në rastin e Kosovës, edhe për Kroacinë është vendosur ndalimi me kusht i shitjes së biletave për një ndeshje jashtë fushe. Masa është pezulluar për dy vjet dhe do të hyjë në fuqi në rast të përsëritjes së shkeljeve përkatëse.
Serbia, ndeshja e radhës në shtëpi pa tifozë
Në të njëjtin vendim disiplinor, UEFA ka ndëshkuar edhe Federatën Serbe të Futbollit. Kjo e fundit është urdhëruar që ndeshjen e radhës në shtëpi ta zhvillojë pa praninë e spektatorëve.
Përveç kësaj mase, federata serbe është gjobitur me 50 mijë euro për sjellje raciste dhe diskriminuese gjatë ndeshjeve kundër Greqisë dhe Holandës. Kësaj shume i shtohen edhe 20 mijë euro gjobë për shfaqjen e një mesazhi të papërshtatshëm për ngjarje sportive.
Vendimet e UEFA-s parashikojnë masa të ndryshme në varësi të shkeljeve të konstatuara, nga gjobat financiare dhe kufizimet e shitjes së biletave deri te zhvillimi i ndeshjeve pa tifozë.
