TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një sulm ukrainas shkaktoi ndërprerje të furnizimit me ujë dhe energji elektrike në Krimenë e pushtuar të shtunën, ndërsa një valë sulmesh me dronë goditi juglindjen e Rusisë, sipas autoriteteve ruse.
“Si pasojë e një incidenti të ndodhur në rrjetet kryesore të energjisë elektrike jashtë rajonit tonë, të shkaktuar nga një sulm armik me dron, janë vendosur kufizime në furnizimin me energji elektrike dhe ujë”, shkroi në Telegram Sergei Aksyonov, kreu i Gadishullit të Krimesë, i vendosur në këtë detyrë nga Moska.
Ai nuk specifikoi numrin e familjeve të prekura në Krime, ku jetojnë më shumë se 2.5 milionë banorë. Gadishulli, të cilin Rusia e aneksoi nga Ukraina në vitin 2014, është shpesh objektiv i sulmeve ukrainase.
Një tjetër sulm ukrainas, në një pjesë të rajonit verilindor të Harkivit që kontrollohet nga Rusia, shkaktoi të paktën tre viktima dhe plagosi rëndë një person të shtunën, sipas autoriteteve të mbështetura nga Moska.
“Tre civilë u vranë dhe një grua u plagos rëndë si pasojë e një sulmi me dron ukrainas ndaj një makine në fshatin Piski, në rajonin e Harkivit”, shkroi në Telegram Vitaliy Ganchev, një guvernator lokal i vendosur nga Rusia.
Ministria ruse e Mbrojtjes njoftoi se gjatë natës kishte rrëzuar gjithsej 616 dronë ukrainas në më shumë se 20 rajone të vendit.
Sipas autoriteteve lokale ruse, disa persona u plagosën nga rënia e copëzave të dronëve, të cilat shkaktuan gjithashtu zjarre.
Një tjetër valë sulmesh me dronë dëmtoi infrastrukturën industriale në qytetin e Togliatit, në brigjet e lumit Vollga, në juglindje të Rusisë, sipas kryetarit të qytetit, Ilya Sukhikh.
Ndërkohë, autoritetet ruse njoftuan se tre trupa u nxorën nga rrënojat pas një sulmi të premten në mbrëmje ndaj një fabrike në Oriol, qytet që ndodhet rreth 370 kilometra në jugperëndim të Moskës.
Pesë persona të tjerë u plagosën rëndë dhe ndodhen në kujdes intensiv, sipas shërbimeve të emergjencës.
Nga ana tjetër, Forcat Ajrore të Ukrainës deklaruan se Rusia kishte lëshuar të paktën 126 dronë drejt territorit ukrainas gjatë natës, nga të cilët 101 u rrëzuan.
Dy persona u plagosën në kryeqytetin ukrainas, Kiev, sipas shërbimeve të emergjencës./REL/
