TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti amerikan, Donald Trump, ka hedhur idenë e vendosjes së tarifave doganore prej 200% ndaj Rusisë dhe Ukrainës, me synimin për t’i detyruar të dyja vendet t’i japin fund luftës. Megjithatë, ai shprehu dyshime për efektivitetin e kësaj mase, duke argumentuar se Shtetet e Bashkuara nuk kryejnë tregti në vlera të mjaftueshme me të dyja vendet për të ushtruar presion të konsiderueshëm ekonomik.
Deklarata e Trump u bë gjatë një tubimi elektoral të zhvilluar një ditë më parë në Florida, ku presidenti amerikan foli për politikën e tij tregtare dhe pretendoi se tarifat doganore kishin ndihmuar në përfundimin e disa konflikteve ndërkombëtare.
“Tarifat na kanë ndihmuar t’i japim fund tetë luftërave. Për pesë prej tyre, do të thosha se shkak vendimtar kanë qenë tregtia dhe tarifat”, deklaroi Trump.
Ai shpjegoi se, në raste të mëparshme, kishte kërcënuar vendet e përfshira në konflikte me vendosjen e tarifave të larta, nëse ato do të vazhdonin luftimet.
“Nëse vazhdojnë të luftojnë, do të vendosim tarifa prej 200% ndaj të dyja vendeve”, tha Trump, duke pretenduar se kërcënime të tilla kishin ndihmuar në ndalimin e luftimeve në rastet për të cilat po fliste.
Më pas, presidenti amerikan sugjeroi se një masë e ngjashme mund të zbatohej edhe ndaj Rusisë dhe Ukrainës, në përpjekje për t’i dhënë fund luftës mes tyre.
“Ndoshta duhet ta bëjmë menjëherë këtë edhe me Ukrainën dhe Rusinë. Nuk më kishte shkuar më parë në mendje”, u shpreh ai.
Megjithatë, Trump pranoi se kjo strategji mund të mos kishte efektin e dëshiruar në rastin e Moskës dhe Kievit, pasi Shtetet e Bashkuara nuk importojnë sasi të mjaftueshme mallrash nga këto dy vende për t’i detyruar të ndryshojnë qëndrimin përmes presionit tregtar.
“Por ne nuk blejmë mjaftueshëm nga ato vende për ta bërë këtë. Kështu që nuk funksionon”, tha presidenti amerikan.
Trump ka pretenduar më parë se kërcënimet për vendosjen e tarifave tregtare kanë ndihmuar në arritjen e marrëveshjeve për t’i dhënë fund konflikteve të ndryshme ndërkombëtare.
Megjithatë, pretendimet e tij për rolin e Shteteve të Bashkuara në marrëveshjen e armëpushimit mes Indisë dhe Pakistanit janë kundërshtuar nga pala indiane. India ka deklaruar se marrëveshja u arrit drejtpërdrejt nga drejtuesit ushtarakë të të dyja vendeve.
