TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një zjarr i fuqishëm ka përfshirë ish-rezidencën malore të Adolf Hitlerit në Bavari të Gjermanisë, duke shkaktuar dëme të mëdha në kompleksin historik të njohur si “Foleja e Shqiponjës” (Eagle’s Nest). Pas ngjarjes, policia gjermane ka ndaluar një person të dyshuar, ndërsa rrethanat e zjarrit mbeten nën hetim.
Rreth 200 zjarrfikës u angazhuan mbrëmjen e së premtes për të vënë nën kontroll flakët që përfshinë Kehlsteinhaus, ndërtesën e ndërtuar posaçërisht për diktatorin nazist. Rezidenca ndodhet në majën e Obersalzbergut, në jug të Gjermanisë, në një lartësi prej 1.834 metrash mbi nivelin e detit.
Sipas policisë, kur ekipet e emergjencës mbërritën në vendngjarje, rreth orës 21:50, e gjithë ndërtesa ishte përfshirë nga flakët. Ndërhyrja u vështirësua nga pozicioni i largët dhe lartësia e kompleksit, ndërsa zjarrfikësit u detyruan të përdornin pajisje të posaçme për frymëmarrjen.
“Një person i dyshuar u mor përkohësisht në ruajtje”, njoftoi policia, duke konfirmuar se nga zjarri nuk pati persona të lënduar.
Shkaku i zjarrit nuk është përcaktuar ende zyrtarisht, por mediat gjermane raportojnë se hetuesit dyshojnë për zjarrvënie të qëllimshme.
Sipas tabloidit “Bild”, një motoçiklist, të cilin efektivët e policisë e ndeshën gjatë rrugës për në vendngjarje, është arrestuar. Megjithatë, autoritetet nuk kanë konfirmuar nëse ai ka lidhje me zjarrin dhe nuk kanë bërë të ditur identitetin e tij.
Zjarri vijonte të digjej edhe në orët e para të mëngjesit të së shtunës, më shumë se nëntë orë pas aktivizimit të alarmit. Në operacion u përfshinë shërbimet zjarrfikëse të gjashtë bashkive, Kryqi i Kuq Bavarez, ekipet e shpëtimit malor dhe policia.
Mëngjesin e së shtunës, flakët duket se ishin shuar, por nga ndërtesa vijonte të dilte tym. Një zëdhënës i policisë i tha gazetës “Bild” se godina ishte dëmtuar rëndë dhe se mundësitë për ta shpëtuar dukeshin të pakta.
Policia ka bllokuar rrugën që të çon drejt rezidencës, ndërsa hetimet vijojnë për të zbardhur shkaqet e ngjarjes dhe për të përcaktuar përgjegjësitë.
Historia e “Folesë së Shqiponjës”
“Foleja e Shqiponjës” u ndërtua gjatë viteve 1937-1938 dhe u përurua zyrtarisht nga Adolf Hitleri në ditëlindjen e tij, në vitin 1939. Kompleksi është një nga vendet historike të lidhura me regjimin nazist, përgjegjës për vrasjen e miliona hebrenjve, romëve, personave LGBTQ+ dhe komunistëve gjatë Holokaustit.
Ndërtesa është ruajtur si monument historik që dëshmon të kaluarën dhe krimet e regjimit nazist. Për të mbërritur atje, vizitorët duhet të përshkojnë një rrugë të ndërtuar në mal dhe një tunel, nga ku hyrja në godinë mundësohet përmes një ashensori prej bronzi të artë, 124 metra të gjatë.
Megjithëse pas Luftës së Dytë Botërore kompleksi u bë i njohur në mbarë botën dhe u paraqit shpesh në filmat amerikanë të luftës si një vend i rëndësishëm takimesh të nazistëve, Hitleri e vizitonte rrallë.
“Foleja e Shqiponjës” i mbijetoi Luftës së Dytë Botërore pa u dëmtuar. Që prej vitit 1952, ajo ka shërbyer si restorant dhe si hapësirë ekspozimi për historinë naziste të ndërtesës, përmes një ekspozite të Institutit të Historisë Bashkëkohore.
