TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Për herë të parë në histori, mjekët italianë kanë realizuar një transplant unik të pjesës qendrore të retinës, makulës, duke i rikthyer pjesërisht shikimin një gruaje që kishte qenë e verbër për pesë vite.
Operacioni u krye në spitalin “Molinette” në Torino dhe përfshiu një paciente 67-vjeçare, e identifikuar si Elena, e cila kishte humbur shikimin në syrin e majtë pas një aksidenti të rëndë automobilistik. Si pasojë e dëmtimit të pariparueshëm të nervit optik, sinjalet e dritës nuk mund të transmetoheshin më nga syri drejt trurit. Sipas spitalit, megjithëse strukturat e syrit të majtë kishin mbetur të paprekura, dëmtimi i nervit optik e kishte bërë të pamundur rikthimin e shikimit. Ndërkohë, syri i djathtë vuante nga degjenerimi makular dhe kishte pësuar dëmtime të rënda në retinë dhe korne.
Mjekët u përballën me një situatë që deri tani konsiderohej e pakapërcyeshme, pasi mungesa e qelizave staminale në zonën e dëmtuar e bënte të pamundur një transplant klasik të kornesë. Ekipi i drejtuar nga profesori Michele Raibaldi arriti të përdorte indet e shëndetshme, por jo funksionale, të syrit të majtë për të krijuar një transplant të plotë anatomik në syrin e djathtë. Për herë të parë në botë, transplanti përfshiu jo vetëm kornenë, sklerën dhe konjuktivën, por edhe pjesën qendrore të retinës, makulën.
Spitali shpjegoi se procedura krijoi një "sy funksional" duke kombinuar pjesë nga dy sy të dëmtuar. Operacioni zgjati pothuajse gjashtë orë dhe u cilësua nga mjekët si jashtëzakonisht kompleks. "Tani po presim të shohim deri në çfarë mase retina e transplantuar do të jetë në gjendje të funksionojë, por rezultatet e para janë inkurajuese", deklaroi profesori Raibaldi.
Risia u konfirmua edhe nga profesori francez Michel Pack, drejtues i departamentit të oftalmologjisë në Spitalin Kombëtar të Caen-Ven në Paris dhe specialist në sëmundjet e retinës, i cili e cilësoi procedurën si një zhvillim të ri botëror. Megjithatë, specialistët theksojnë se nevojiten më shumë studime shkencore për të vlerësuar efektivitetin afatgjatë të kësaj teknike dhe për të përcaktuar nëse ajo mund të aplikohet te pacientë të tjerë me probleme të ngjashme të shikimit.
