TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Koreja e Veriut ka lëshuar sot disa raketa me rreze të shkurtër drejt Detit të Japonisë, vetëm një ditë pas përfundimit të stërvitjeve të përbashkëta ushtarake mes Koresë së Jugut, Shteteve të Bashkuara dhe Japonisë.
Sipas agjencisë koreanojugore Yonhap, duke cituar Shtabin e Përgjithshëm të Ushtrisë së Koresë së Jugut, raketat përshkuan një distancë prej rreth 250 kilometrash përpara se të binin në Detin e Japonisë, i njohur gjithashtu si Deti Lindor.
Lëshimi është konfirmuar edhe nga Komanda e SHBA-së në Paqësor, e cila deklaroi se raketat nuk përbënin kërcënim të menjëhershëm për personelin apo territorin amerikan, si dhe për aleatët e Shteteve të Bashkuara.
Lëshimet ndodhën një ditë pasi përfundoi një stërvitje ushtarake pesëditore e zhvilluar në ujërat në jug dhe lindje të ishullit koreanojugor Jeju. Në manovra morën pjesë forcat ajrore dhe detare të SHBA-së, Koresë së Jugut dhe Japonisë.
Pheniani e kishte cilësuar më herët këtë stërvitje si “provokuese”, ndërsa Shtetet e Bashkuara kanë deklaruar se ajo u zhvillua në ujëra ndërkombëtare.
Deri tani, Koreja e Veriut nuk ka reaguar publikisht për lëshimet e fundit të raketave.
Pheniani ka kryer edhe lëshime të ngjashme rreth tre javë më parë. Vendi është i ndaluar të kryejë lëshime të raketave balistike në bazë të disa rezolutave të Këshillit të Sigurimit të Kombeve të Bashkuara.
Tensionet në Gadishullin Korean janë shtuar në një periudhë kur SHBA-ja dhe Koreja e Jugut kanë zhvilluar aktivitete të përbashkëta ushtarake. Në mesin e gushtit, të dyja vendet kryen disa lëshime raketash në kuadër të aktiviteteve të tyre ushtarake.
Ndërkohë, presidenti amerikan Donald Trump kishte urdhëruar një reduktim të ndjeshëm të një stërvitjeje të përbashkët ushtarake me Korenë e Jugut, duke përmendur marrëdhënien e tij “shumë të mirë” me liderin e Koresë së Veriut, Kim Jong Un.
Trump ka deklaruar se pret të takohet sërish me Kim Jong Un më vonë gjatë këtij viti, por lideri koreano-verior deri tani nuk i është përgjigjur publikisht ofertës për bisedime.
Javën e kaluar, Kim Jong Un deklaroi gjithashtu se synon të zhvillojë më tej marinën e Koresë së Veriut, duke e kthyer atë në një forcë të armatosur me armë bërthamore.
