TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një dosje e re hetimore, me dyshimin për dhunë seksuale, është hapur nga Prokuroria e Romës në lidhje me Jeffrey Epstein dhe të ashtuquajturat “Epstein Files”.
Nga Capri në Milano, nga Roma në Bregdetin Amalfitan, gjurmët e rrjetit të financierit të akuzuar për abuzime seksuale me të mitur, i arrestuar për trafikim të të miturve dhe i cili u gjet i vdekur në një qeli në Manhattan në vitin 2019, janë shtrirë edhe në Itali.
Këtë e tregojnë dhjetëra mijëra faqe dokumentesh të deklasifikuara nga administrata e Donald Trump, pas presionit të Kongresit amerikan, ku shfaqen disa referenca për Italinë.
Megjithatë, ajo që ende nuk është e qartë është nëse ndonjë prej sipërmarrësve, politikanëve apo akademikëve italianë që kanë pasur kontakte me Epstein ka marrë pjesë, në çfarëdo forme apo mase, në sistemin e shfrytëzimit të të miturve dhe dhunës seksuale ndaj vajzave të reja.
Sipas “La Repubblica”, objektivi i dosjes së re, e cila ka mbërritur në tryezën e prokurorit të posaçëm Maurizio Arcuri në Piazzale Clodio, është të sqarohet nëse persona që ndodhen në territorin italian ose shtetas italianë jashtë vendit janë përfshirë në vepra penale të natyrës seksuale.
Prokuroria e Romës kërkon dokumentet nga SHBA
Prokuroria e Romës nuk është mjaftuar vetëm me nisjen e hetimit, por i është drejtuar edhe autoriteteve amerikane përmes një kërkese zyrtare për ndihmë juridike ndërkombëtare.
Qëllimi është që Departamenti amerikan i Drejtësisë t’i vërë në dispozicion të gjitha dokumentet që disponon në lidhje me krimet dhe veprat e dyshuara penale të kryera nga Jeffrey Epstein dhe bashkëpunëtorët e tij.
Kërkesa përfshin jo vetëm dosjet që janë bërë tashmë publike, por edhe ato dokumente që, për një arsye apo një tjetër, administratat amerikane nuk i kanë bërë publike ndër vite.
Hetimi nisi pas një kallëzimi
Hetimi në Romë dyshohet se nisi pas një kallëzimi të paraqitur më 26 mars nga shoqata “Differenza Donna”, e cila i kërkoi Prokurorisë së Romës të hetonte mbi ekzistencën e mundshme të veprave penale transnacionale të dhunës, trafikimit dhe shfrytëzimit seksual të grave dhe të miturve, të lidhura me Epstein.
Sipas asaj që ka dalë nga dokumentet amerikane, në to ka disa referenca për persona italianë, si edhe të dhëna “të rëndësishme dhe jo episodike” lidhur me qëndrime dhe lëvizje të personave të përfshirë në territorin italian.
Kërkesa drejtuar prokurorëve italianë është që hetimi të shkojë një hap më tej dhe të verifikohet nëse gjatë këtyre qëndrimeve në Itali, apo në rrethin e miqësive dhe kontakteve të financierit, mund të kenë ndodhur raste abuzimi ndaj vajzave të reja dhe të mitura.
Në këtë mënyrë, hetimi i Prokurorisë së Romës bëhet pjesë e një serie hetimesh të nisura në vende të ndryshme mbi rrjetin e Jeffrey Epstein.
Hetime të ngjashme janë zhvilluar tashmë në Paris, Oslo dhe Varshavë, ndërsa vëmendja është përqendruar edhe në Britaninë e Madhe, ku ish-princi Andrew dhe ish-ambasadori Peter Mandelson janë përballur tashmë me pasoja lidhur me marrëdhëniet e tyre me Epstein.
