LEXO PA REKLAMA!

SHKARKO APP

App Store
Google Play
MERR NJOFTIME NGA TPZ.AL
NDIQ TPZ NE YOUTUBE NDIQ TPZ NE FACEBOOK

TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.

FLASH!

AKTUALITET, 20 Korrik 2018, 09:47

Efektet e Vetingut/ Urdhri i Zaganjorit “ngrin” gjyqtarët e shkarkuar nga KPK

TPZ
Efektet e Vetingut/ Urdhri i Zaganjorit “ngrin” gjyqtarët e

Kreu i Gjykatës së Lartë, Xhezair Zaganjori, ka nxjerrë një urdhër të brendshëm për përjashtimin nga çështjet dhe relatimet të gjyqtarëve të kësaj gjykate, që marrin masën disiplinore “shkarkim nga detyra” prej Komisionit të Pavarur të Kualifikimit.

Kështu, Admir Thanza, Tom Ndreca dhe Artan Zeneli do t’i lënë çështjet që kanë nën shqyrtim ose ato që janë relatorë deri sa vendimi të marrë formë të prerë.

Ligji përcakton se gjyqtarët qëndrojnë në detyrë deri sa vendimi për shkarkim nga KPK-ja merr vendim të formës së prerë, mirëpo Zaganjori nuk kërkon të rrezikojë, duke i përjashtuar gjyqtarët e shkarkuar nga Shkalla e Parë nga gjykimi i çështjeve. Urdhri ka dalë më 17 korrik 2018 dhe ka hyrë në fuqi menjëherë.

URDHRI

“Në mbështetje të pikës 5 dhe 6 të nenit F të Aneksit të Kushtetutës dhe pikës 1 dhe 2 të nenit 62 të ligjit nr.84/ 2016 ‘Për rivlerësimin kalimtar të gjyqtarëve dhe prokurorëve në Republikën e Shqipërisë’, urdhëroj:

  1. Gjyqtarët e Gjykatës së Lartë, ndaj të cilëve Komisioni i Pavarur i Kualifikimit vendos masën disiplinore ‘shkarkim nga detyra’, nuk marrin pjesë në shqyrtimin dhe gjykimin e çështjeve gjyqësore në Dhomë Këshillimi apo seancë gjyqësore, deri në marrjen e vendimit përfundimtar nga Kolegji i Apelimit ose marrjen formë të prerë të vendimit të Komisionit të Pavarur të Kualifikimit.

  2. Çështjet gjyqësore me afate gjykimi të menjëhershme, për të cilat gjyqtari i shkarkuar nga detyra është caktuar relator, do të rilidhen me short mes gjyqtarëve të tjerë të të njëjtit Kolegj, ose në pamundësi, midis gjyqtarëve të Kolegjeve të tjera, ndërsa çështjet në të cilat është anëtar i trupit gjykues do të gjykohen nga gjyqtarët e gatshëm.

  3. Sektori IT të marrë masat e nevojshme teknike në sistemin ICMIC për mospërfshirjen e gjyqtarëve të shkarkuar nga detyra, nga zhvillimi i shortit elektronik për çështjet gjyqësore të regjistruara pas datës së shpalljes së vendimit të Komisionit të Pavarur të Kualifikimit.

  4. Ndihmësit ligjorë të këtij gjyqtari të vazhdojnë ushtrimin e rregullt të detyrës, në përputhje me urdhrat dhe porositë e Kryetarit të Gjykatës së Lartë dhe Kryetarit të Kolegjit ku gjykonte gjyqtari pranë të cilit ushtronin detyrën dhe të trajtojnë dosjet gjyqësore sipas radhës së regjistrimit si edhe normës mujore të përcaktuar.

  5. Ngarkohet Kancelari, Sektori IT dhe Sektori i Regjistrimit për zbatimin e këtij urdhri.

6. Ky urdhër t’u komunikohet anëtarëve të Gjykatës së Lartë dhe ndihmësve ligjorë”, shkruan urdhri.