TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti i Ukrainës Volodymyr Zelensky ka bërë një apel urgjent për më shumë armë për të shmangur një situatë "katastrofike" në Evropë.
Një "deficit i armëve" do të ndihmojë vetëm Rusinë, tha Zelensky në një konferencë ndërkombëtare në Gjermani.
Trupave ukrainase po u mbarojnë municionet pasi mbështetja jetike e SHBA-së është mbajtur nga mbështetësit e ish-presidentit Donald Trump në Kongres.
Zelensky tha se ishte i përgatitur të vizitonte vijën e parë me Trump.
"Nëse zoti Trump do të vijë, unë jam gati të shkoj me të në vijën e parë të frontit. Çfarë do të thotë, luftë e vërtetë, jo Instagram, luftë e vërtetë," tha presidenti ukrainas.
Ndërkohë nga ana e tij Presidenti Joe Biden e siguroi Zelenskyn gjatë një telefonate të shtunën se SHBA-të ishin të përkushtuara për të mbështetur luftën e Ukrainës kundër "pushtimit brutal të Rusisë".
Biden tha gjithashtu se më herët gjatë ditës "ushtria ukrainase u detyrua të tërhiqej nga Avdiivka pasi ushtarëve ukrainas iu desh të raciononin municionet për shkak të pakësimit të furnizimeve si rezultat i mosveprimit të Kongresit, duke rezultuar në fitimet e para të dukshme të Rusisë në muaj".
Avdiivka, një portë për në kryeqytetin rajonal Donetsk të pushtuar nga Rusia në lindje, kishte dëshmuar për muaj të tërë disa nga luftimet më të ashpra përpara tërheqjes së Ukrainës të shpallur nga komandanti i lartë ushtarak i vendit.
Nga ana e tij, Presidenti Zelensky tha në një postim në X, dikur Twitter, se të dy udhëheqësit diskutuan situatën aktuale në vijën e parë.
