TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti amerikan Donald Trump ka bërë një deklaratë të fortë në rrjetin e tij social Truth Social, duke iu përgjigjur drejtpërdrejt Udhëheqësit Suprem të Iranit, Ayatollah Ali Khamenei, i cili së fundmi shpalli "fitoren" e Iranit ndaj Izraelit dhe kritikoi ashpër Trumpin.
Në një ton sfidues dhe provokues, Trump e quajti deklaratën e Khameneit “gënjeshtër të turpshme” dhe “shprehje budallallëku”, duke e përshkruar Iranin si një vend të rrënuar nga lufta.
“Vendi i tij u shkatërrua, tre nga objektet e tij kryesore bërthamore u eliminuan. Unë e dija saktësisht ku ishte fshehur dhe nuk lejova Izraelin apo ushtrinë amerikane — më të fuqishmet në botë — t’i jepnin fund jetës së tij. E shpëtova nga një vdekje e shëmtuar dhe e turpshme”, shkroi Trump.
Ish-presidenti deklaroi gjithashtu se në një moment kishte urdhëruar që një grup i madh avionësh izraelitë të tërhiqeshin nga një sulm i mundshëm ndaj Teheranit, duke e quajtur atë "aktin e fundit të luftës" dhe një operacion që mund të kishte rezultuar në "sulm të madh përfundimtar".
“Do të shkaktoheshin dëme të mëdha, shumë iranianë do të vriteshin. Por u ndala — e mendova mirë,” shtoi ai.
Në pjesën tjetër të deklaratës, Trump tha se kishte punuar për një zbutje të mundshme të sanksioneve ekonomike ndaj Iranit, për të ndihmuar vendin të rimëkëmbej, por pas deklaratës së Khameneit, ai vendosi të ndërpresë çdo përpjekje diplomatike.
“Në vend të bashkëpunimit, mora vetëm urrejtje dhe neveri. Iranit i duhet të kthehet në rrugën e rendit botëror, ose përndryshe situata vetëm do të përkeqësohet. Tashmë kanë një ushtri të shkatërruar, një ekonomi të dështuar dhe vdekje përreth tyre.”
Këto deklarata vijnë në një moment të tensionuar në Lindjen e Mesme, me marrëdhëniet Iran–SHBA që mbeten jashtëzakonisht të brishta dhe në sfondin e përplasjes së vazhdueshme mes Iranit dhe Izraelit.
