TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Papa Leoni XIV ka dënuar këtë javë ashpër “barbarinë e luftës në Gaza” dhe “përdorimin pa kriter të dhunës”, ndërsa situata humanitare në Rripin e Gazës vazhdon të përkeqësohet çdo ditë.
Sipas Ministrisë së Shëndetësisë në Gaza, të paktën 73 palestinezë janë vrarë të dielën, më 20 korrik, teksa prisnin në radhë për ndihma ushqimore në disa zona të veriut të Gazës.
Drejtori i spitalit al-Shifa, Mohammed Abu Salmiya, i tha agjencisë Associated Press se vetëm gjatë mëngjesit, spitali kishte pranuar 48 të vdekur dhe 150 të plagosur, shumica prej tyre civilë që kërkonin ndihmë pranë kamionëve të OKB-së, të cilët po përpiqeshin të hynin në Gaza përmes pikës kufitare Zikim.
Papa kërkon armëpushim të menjëhershëm
Në një fjalim pas lutjes Angelus, nga rezidenca e tij verore në Castel Gandolfo, afër Romës, Papa kërkoi ndalim të menjëhershëm të luftimeve dhe zgjidhje paqësore të konfliktit.
Ai shprehu gjithashtu dhimbjen e tij për goditjen izraelite mbi kishën katolike të Gazës javën e kaluar, ku mbetën të vrarë tre persona dhe u plagosën dhjetë të tjerë, përfshirë priftin e famullisë, një i njohur i ndjerë Papa Françeskut.
Kisha, e cila u dëmtua rëndë, strehonte rreth 600 persona të zhvendosur, shumica fëmijë dhe të sëmurë me nevoja të veçanta.
“Ky akt, fatkeqësisht, i shtohet sulmeve të vazhdueshme ushtarake ndaj civilëve dhe vendeve të kultit në Gaza,” deklaroi Papa.
Ai i bëri thirrje bashkësisë ndërkombëtare të respektojë të drejtën humanitare, të mbrojë civilët dhe të ndalojë dënimin kolektiv, dhunën pa dallim dhe dëbimin e detyruar të popullsisë.
Nga ana tjetër, zyra e kryeministrit izraelit Benjamin Netanyahu konfirmoi se ai ka zhvilluar një bisedë me Papën më 18 korrik. Në një postim në rrjetin “X” (ish-Twitter), zyra e tij shkruan:
“Kryeministri shprehu keqardhjen për incidentin tragjik, ku municione të papërcaktuara goditën gabimisht kishën e Familjes së Shenjtë në Gaza.”
Në një deklaratë tjetër, zyra e Netanyahut tha se ai e kishte informuar Papën për përpjekjet e Izraelit për të arritur një marrëveshje për lirimin e pengjeve dhe një armëpushim 60-ditor në Gaza, për të cilat sipas tij, Hamas ende nuk ka dhënë përgjigje.
UNRWA: “Po na pengojnë të ndihmojmë 1 milion fëmijë”
Ndërkohë, agjencia e OKB-së për refugjatët palestinezë, UNRWA, akuzoi të dielën autoritetet izraelite për “uri të qëllimshme të civilëve në Gaza”, përfshirë rreth 1 milion fëmijë.
“UNRWA ka rezerva ushqimore të mjaftueshme për të ushqyer të gjithë popullsinë e Gazës për më shumë se tre muaj,” thuhet në një deklaratë të publikuar bashkë me foto nga një magazinë në Al-Arish të Egjiptit.
Agjencia i bëri thirrje Izraelit që të hapë rrugët dhe të lejojë ndihmat humanitare:
“Hiqni bllokadën, lëreni UNRWA-n të bëjë punën e saj dhe të ndihmojë njerëzit në nevojë – përfshirë 1 milion fëmijë,” përfundon mesazhi i tyre.
