TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gjermania së shpejti do të heqë detyrimin e mbajtjes së maskave në trenat dhe autobusët në distanca të gjata, një nga kufizimet e fundit për COVID-19, bëri të ditur të premten ministri gjerman i Shëndetësisë.
Ky kufizim eshte vendosur të hiqet më 2 shkurt, njoftoi në Berlin ministri i Shëndetësisë, Karl Lauterbach, raportoi Associated Press.
Vende të tjera evropiane tashmë kanë hequr mandatet e maskave në transportin publik dhe javët e fundit Lauterbach u përball me presion në rritje për të ndjekur shembullin. Maskat mbeten të detyrueshme në praktikat e mjekëve, ndërsa maskat dhe testet negative kërkohen ende për të hyrë në spitale dhe shtëpi pleqsh.
Rregullat për transportin lokal janë një çështje e 16 qeverive të shteteve të Gjermanisë dhe një numër në rritje po heqin kufizimin e mbajtjes së maskave.
Rregullat e transportit në distanca të gjata ishin planifikuar të përfundonin më 7 prill, megjithëse legjislacioni lejon që ato të pezullohen më herët nëse situata është më e mirë se sa pritej.
