TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti amerikan Donald Trump, përmes një postimi në rrjetin social Truth Social, ka paralajmëruar në mënyrë të qartë vendosjen e tarifave shtesë prej 50% ndaj Bashkimit Evropian duke filluar nga 1 qershori 2025, duke theksuar se negociatat me udhëheqësit e BE-së nuk kanë dhënë rezultat.
Presidenti republikan e konsideroi si të papranueshëm “deficitin tregtar vjetor prej 250 miliardë dollarësh” dhe sqaroi se nuk do të vendosen tarifa shtesë nëse produktet janë të prodhuara ose të përpunuara në Shtetet e Bashkuara të Amerikës.
“Bashkimi Evropian, i cili është krijuar fillimisht me qëllim për të përfituar nga Shtetet e Bashkuara në fushën e TREGTISË, është treguar një kundërshtar shumë i vështirë.
Pengesat e forta tregtare, taksat e TVSH-së, sanksionet qesharake ndaj kompanive, barrierat jotarifore, manipulimet monetare, paditë e padrejta dhe të pajustifikuara ndaj kompanive amerikane dhe të tjera kanë çuar në një deficit tregtar me SHBA-të që e kalon shumën prej 250 miliardë dollarësh në vit, një shumë që është tërësisht e papranueshme.
Negociatat tona me ta nuk po çojnë askund! Për këtë arsye, propozoj vendosjen e menjëhershme të një tarife 50% ndaj Bashkimit Evropian, që do të hyjë në fuqi më 1 qershor 2025. Nuk do të ketë tarifë nëse produkti është i prodhuar ose i përpunuar në Shtetet e Bashkuara të Amerikës. Ju faleminderit për vëmendjen në këtë çështje!”, shkruan Trump.
Njoftimi shënon një përshkallëzim të luftës tregtare të Trump me BE-në, e cila tashmë është goditur me një tarifë prej 20% për të gjitha eksportet amerikane.
Presidenti kërcënoi gjithashtu të vendoste një taksë importi prej 25% për iPhone-t që nuk prodhohen në Amerikë.
