BALLKAN, 19 Mars 2023, 11:01

“Ndërhyrje në punët e brendshme”, Dodik kërcënon të ndërpresë lidhjet diplomatike me SHBA-në dhe Britaninë

“Ndërhyrje në punët e brendshme”, Dodik

Udhëheqësi serb i Bosnjës Milorad Dodik ka kërcënuar se do të ndërpresë kontaktet me diplomatët dhe ambasadat e SHBA-së dhe Britanisë në Bosnje-Hercegovinë për atë që zyra e Dodik tha se ishte ndërhyrje në punët e brendshme të Bosnjës.

Zyra e Dodik tha në një deklaratë më 17 mars se është formuar një ekip për “përpilimin e informacionit gjithëpërfshirës mbi aktivitetet anti-Dayton të diplomatëve dhe ambasadave amerikane dhe britanike dhe ndërhyrjen e tyre në punët e brendshme të Bosnjë-Hercegovinës”.

Në deklaratë thuhej se Republika Srpska, entiteti boshnjak që Dodik drejton, do ta marrë atë vendim brenda javës së ardhshme.

Deklarata i referohej Marrëveshjes së Dejtonit të vitit 1995, e cila i dha fund luftës civile në Bosnje dhe krijoi një sistem administrativ sipas të cilit Bosnja mbetet e ndarë midis një entiteti serb-Republika Srpska- dhe federatës boshnjako-kroate të lidhur nga një qeveri e dobët qendrore.

Ambasada e SHBA në Sarajevë tha se njoftimi nga zyra e Dodik “ishte jokonstruktiv dhe faktikisht i pasaktë”. Në një postim në Twitter, ambasada tha se Shtetet e Bashkuara do të “vazhdojnë të qëndrojnë me të gjithë njerëzit e BiH ndërsa punojnë për të forcuar këtë vend dhe për të siguruar vendin e tyre të merituar në komunitetin euro-atlantik të kombeve”.

Ambasada britanike në Bosnje hodhi poshtë akuzat dhe e quajti deklaratën “konfuze”, duke thënë se ajo nuk kontribuoi në asgjë.

“Ne i hedhim poshtë plotësisht akuzat e bëra, të cilat duken si një përpjekje e çuditshme për të larguar vëmendjen nga problemet reale”, thuhet në deklaratën e Ambasadës Britanike. “Mbretëria e Bashkuar mbetet një mike e të gjithë qytetarëve të Bosnjë dhe Hercegovinës dhe do të vazhdojë të punojë në të gjithë vendin për të mirën e të gjithëve”.

Dodik, i cili është futur në listën e zezë nga Shtetet e Bashkuara dhe Britania në raunde të shumta sanksionesh mbi përpjekjet e supozuara për destabilizimin dhe korrupsionin, ka kërcënuar prej kohësh të kërkojë pavarësinë e Republikës Srpska nga pjesa tjetër e Bosnjës. Ai refuzon rregullimin administrativ dhe autoritetin e Zyrës së Përfaqësuesit të Lartë, mbikëqyrës i komunitetit ndërkombëtar për aspektet civile dhe të tjera të Marrëveshjes së Dejtonit.

Dodik në javët e fundit ka shkaktuar polemika duke përsëritur mohimin e tij të gjenocidit gjatë luftës civile në Bosnje 1992-95 në masakrën e 8,000 burrave dhe djemve në Srebrenicë në Bosnjën lindore në 1995.

Prokuroria e Bosnjë-Hercegovinës javën e kaluar ngriti një rast kundër Dodik për mohim. Gjithashtu javën e kaluar, Shtetet e Bashkuara kundërshtuan komentet e bëra nga Dodik në të cilat ai u përpoq të minonte Gjykatën Kushtetuese të Bosnjës dhe përsëriti kërcënimet për shkëputje.

Raundi i fundit i sanksioneve të Shteteve të Bashkuara të vendosura ndaj zyrtarëve boshnjakë u njoftua më 15 mars dhe u emërua Dragan Stankoviç, një aleat i Dodik. Stankoviç ka shërbyer si drejtor i agjencisë së Republika Srpska përgjegjëse për ligjin e pasurive të paluajtshme dhe ishte në listën e zezë për promovimin e një ligji që kërkonte të “uzurponte” pronën shtetërore në kundërshtim me kushtetutën kombëtare.

Republika Srpska është përpjekur shumë herë të zbatojë ligjin, i cili synon të transferojë pronën shtetërore të Bosnjës te Republika Srpska, pavarësisht se ai konsiderohet jokushtetues.