BALLKAN, 18 Mars 2023, 17:58

Bisedimet Kurti -Vuçiç në ish-vilën verore të Titos buzë liqenit të Ohrit, çfarë pritet të ndodhë

Bisedimet Kurti -Vuçiç në ish-vilën verore të Titos
Lajçak, Borrell dhe Kovaçevski

Në një rezidencë shtetërore buzë Liqenit të Ohrit, që dikur ishte vila verore e udhëheqësit jugosllav Josip Broz Tito, janë takuar sot Kryeministri Albin Kurti dhe Presidenti i Serbisë, Aleksandër Vuçiq.

Takimi nisi pas disa orë diskutimesh që ata i patën me ndërmjetësuesit evropianë, ndaras.  Në Ohër BE po përpiqet t’i bindë palët që t’a dakordojnë tekstin e Planit të Zbatimit të Marrëveshjes, për të cilën janë pajtuar më 27 shkurt në Bruksel.

Kryeministri Kurti është deklaruar optimist mëngjesin e sotëm, kur ka folur para gazetarëve të shumtë që janë mbledhur në Ohër.

“Unë jam optimist, jam i vëmendshëm dhe do të bëjmë më të mirën për Republikën e Kosovës, sovranitetin dhe integritetin territorial, interesin publik dhe të popullit, për të gjithë qytetarët pa dallime, sepse unë jam kryeministër i Republikës i të gjithë qytetarëve”, tha Kurti.

Sipas agjendës së Bashkimit Evropian, bisedimet sot do të nisnin në orën 10:30. Deri në atë kohë, Kryeministri Kurti realizoi disa takime.

Është pritur nga Presidenti maqedonas Stevo Pendarovski dhe nga Kryeministri Dimitar Kovaçevski, të cilët  ishin të lumtur si nikoqirë. Ndërsa, siç ka njoftuar Zyra e Kryeministrit, Kurti i ka falënderuar edhe për mikpritjen e sotme, edhe për bashkëpunimin fqinjësor në përgjithësi.

Bisedimet Kurti -Vuçiç në ish-vilën verore të Titos

Në Ohër, Kurti e ka takuar edhe një prej liderëve shqiptarë, kreun e Bashkimit Demokratik për Integrim, Ali Ahmetin.

Bisedimet Kurti -Vuçiç në ish-vilën verore të Titos


Deri tash, takimet mes Kryeministrit Kurti dhe Presidentit Vuçiq janë mbajtur në Bruksel. Ishte e pazakontë zgjedhja e Ohrit për këtë takim. Kryeministri Kurti nuk humbi as këtë rast për të bërë përshkrime – kësaj radhe Liqenit të Ohrit Ohrit. 

Në vendin e ngjarjes, përveç ndërmjetësuesve evropianë, ka shkuar edhe emisari amerikan për Ballkanin Perëndimor, Gabriel Escobar. Sic tha ambasadorja e SHBA-së në Maqedoninë Veriore, Angela Aggeler, Escobar merr pjesë në takim “në cilësinë e vëzhguesit”.

Kryeministri Kurti, që s’i kishte as 24 orë nga pritja që ia bëri Escobarit në Prishtinë, e takoi edhe sot në Ohër, shkurtimisht.

Prej 27 shkurtit, kur ishte caktuar takimi i sotëm, pritej që në Ohër të kishte një marrëveshje. Kurti ka thënë se atje ka shkruar për “bisedime për marrëveshjen”.

 “Përderisa nuk ka tekst të përfunduar nuk mund të ketë përfundim të bisedimeve, përderisa nuk ka përfundim të bisedimeve nuk mund të këtë marrëveshje. Unë jam këtu për dialog parimor të hapur serioz që duhet të rezultojë me marrëveshjen. Marrëveshja nënkupton tekst përfundimtar dhe të dakorduar. Pra, nuk kam ardhur për bisedime për bisedime por për bisedime për marrëveshje”, tha Kurti.

Ndërkaq, emisari Escobar i ka thënë Radios Evropa e Lirë se kanë pritje për finalizimin e aneksit të propozimit evropian,

“Shikoni, ne nuk jemi të fokusuar në nënshkrim, por po fokusohemi në finalizim. Kjo do të thotë të kemi një pajtim që të dyja vendet të përgatiten për diskutime reale dhe një pajtim real në marrëdhënien e tyre. Kështu që, kjo është më e rëndësishme: finalizimi i aneksit”, ka thënë sot Escobar.

Prej deklarimeve të fundit të palëve, kishin kaluar disa orë, dhe rreth orës 15:00, zëdhënësi për Politikë të Jashtme i Bashkimit Evropian, Peter Stano, doli t’ua sqarojë disa gjëra gazetarëve.

Ai tha se pasi të përfundojnë të gjitha takimet, para tyre do të flasë vetëm Kryediplomati evropian, Josep Borrell, por në konferencë nuk do të mund t’i bëhen pyetje.

Stano tha se nuk dihet kur përfundojnë diskutimet, por kjo mund të ndodhë “pasdite vonë, ose në mbrëmje”.

Bashkimi Evropian ka publikuar disa fotografi, ku dy liderët shihen ballë-për-ballë me njëri-tjetrin, ndërsa Borrell dhe emisari për dialogun, Miroslav Lajcak, në mes.

Bisedimet Kurti -Vuçiç në ish-vilën verore të Titos

Kanë bashkëngjitur edhe një videoje me mbishkrim, ku përshkruhet takimi, ndërkaq te Kurti, kur tregojnë se është kryeministri kosovar, i kanë vendosur një fusnotë.