TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Beteja e veteranëve të UÇK-së me Qeverinë në përpjekjen e tyre për t’u përfshirë në projektligjin që përcakton pagën minimale, duket se nuk ka përfunduar ende.
Sot në orën 09:30 veteranët kanë planifikuar mbajtjen e një “proteste gjithëpopullore” para Kuvendit dhe Qeverisë.
Të indinjuar që deputetët të martën miratuan në parim projektligjin për caktimin e pagës minimale i cili i mënjanon ata, veteranët kanë paralajmëruar dalje masive në protestën e sotme.
Kryetari në detyrë i Organizatës së Veteranëve të Luftës së UÇK-së, Faton Klinaku, ka njoftuar në Facebook se do të ketë organizim me autobusë në mënyrë që protestës t’i bashkohen veteranët nga i gjithë vendi.
Çfarë është paralajmëruar?
Kryetari i degës së OVL-së së UÇK-së në Drenas, Enver Hajdari tha të mërkurën në Frontal të T7 se “për çdo gjë që ndodh, le ta mbajë përgjegjësinë qeveria aktuale që sot është në pushtet”.
“Ne po mundohemi që protesta mos të na dalë jashtë kontrollit dhe të ketë dalje masive. Është një e drejtë e jona të protestojmë, sepse qeveria ka bërë përjashtim”, tha ai.
Pak a shumë të njëjtën gjë e paralajmëroi edhe Metush Kryeziu, anëtar i Kryesisë së OVL-UÇK-së
“Sipas informatave që i kam, të gjitha degët janë duke punuar në terren. Ta shohim situatën. Mirëpo kjo përgjegjësi i bie Qeverisë për situatën aktuale”, tha ai të martën në Frontal.
I pyetur se çka mund të ndodhë në protestë, Kryeziu tha:
“Ta shohim. Në ato rrethana mund të eskalojë edhe situata sepse veteranët janë në gjendje të rëndë”.
Policia është përgatitur
Policia e Kosovës ka njoftuar se janë marrë masat e nevojshme dhe se janë takuar me përfaqësues të OVL të UÇK-së me qëllim të njoftimit rreth organizimit të protestës, vendit dhe kohës së mbajtjes.
“Policia e Kosovës me qëllim të ruajtjes së rendit dhe qetësisë publike si dhe mbarëvajtjes së protestës së lajmëruar sipas ligjit mbi tubimet publike nga Veteranët e UÇK-së, ka bërë përgatitjet e nevojshme operacionale policore. Sot, më 15.06.2022, zyrtarë nga PK-ja, kanë zhvilluar një takim njoftues me përfaqësues të Shoqatës së Veteranëve të UÇK-së me qëllim të njoftimit rreth organizimit të protestës, vendit dhe kohës së mbajtjes së saj dhe masave tjera që lidhen me zhvillimin e protestës”, thuhet në njoftimin e Policisë.
Organi i rendit bëri thirrje për protestë të qetë.
“Policia e Kosovës e njeh të drejtën e shprehjes së lirë, pakënaqësive (protestës) si e drejtë ligjore. Lidhur me këtë lajmërim PK-ja, ka filluar me kohë përgatitjen dhe ndërmarrjen e masave që kanë për qëllim mbarëvajtjen e protestës, ruajtjen e rendit dhe sigurisë publike, ofrimin e sigurisë për qytetarët, mbrojtjen e pronës dhe ofrimin e sigurisë në trafik. Policia do të ndërmerr masat e nevojshme preventive, operative policore për të siguruar që mbarëvajtja e tubimit / protestës të kalojë pa ndonjë incident, që pjesëmarrësit në protestë të shprehin qëllimin e tyre në mënyrë demokratike dhe në suaza ligjore”, thuhet në njoftim.
Sipas procedurave të parapara, Policia tha se “do të marrë masa dhe do të shtojë aktivitetet operative para, gjatë dhe pas përfundimit të protestës”.
