TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Gazetari Artan Hoxha ka skanuar situatën e grupeve kriminale në disa qytete të Shqipërisë. I ftuar në emisionin “Të Paekspozuarit” në MCN TV, Hoxha është shprehur se çdo qytet ka grupet e tij, por ai ka zbuluar se ndryshe nga rrethet, në Tiranë grupet kriminale kanë zgjedhur metoda më të sofistikuara.
Krimi më i madh, sipas tij në Tiranë ndodh me vendosjen e gjobave ndaj bizneseve, ku në muajt e fundit një biznesmeni i është vënë një gjobë prej 800 mijë euro dhe nuk e ka denoncuar nga frika.
“Tirana është tregu më i madh, por pas ngjarjes së ndodhur në Bllok, nuk ka më shumë ngjarje, nuk duan të ekspozohen, grupet këtu kanë një lloj marrëveshje dhe nuk prekin zonat e njëri tjetrit. Nuk duan të ekspozohen. Tirana ndryshe nga qytetet e tjera, krimi më i madh që ndodh në Tiranë është gjoba. Gjoba ndaj biznesmenëve!
Gjobat kanë qenë vazhdimisht problem, ka disa momente kur rriten, pra intensifikohet dhe ka momente që bie. Kur intensifikohet, shteti është dobët, bie vigjilenca.
Gjobat u vihen bizneseve që kanë mundësi t'i paguajnë.
Në Tiranë një pjesë e mirë e bizneseve të mëdha bashkëpunojnë sidomos me grupet e mëdha të trafikut të kokainës, sepse marrin paratë e tyre, se s’kanë ku t’i çojnë ,dhe ata injektojnë para, tek ato kompani që kanë probleme dhe nëse nuk i rimarrin paratë i marrin biznesin.
Gjatë vitit të kaluar, brenda një nate u goditën katër kompani kryesore që janë në autostradë, u mitroluan. Shkoi një makinë atje, dhe goditi fasadat e bizneseve .
Pra kur biznesi goditet me armë, do të thotë se po reziston dhe nuk ka paguar gjobën. .
Unë di një rast ditët e fundit, ku një biznesmen, nuk donte ta publikonte në media dhe nuk do e denonconte në polici, ai ka një firmë rrugësh, që ka marrë tenderë publikë. I kishin marrë 800 mijë euro dhe një vilë 450 mijë euro, dhe ata që po i merrnin gjobën ishin personazhe te viteve 2000. Edhe kërkonte ndihmë edhe nuk denonconte.
Disa nga kompanitë e mëdha, në mos kanë marrë punë të përbashkëta me grupet e mëdha, i kanë pajtuar ato për t’i ofruar siguri, kanë marrë licensë si polici private dhe i kanë pajisur me leje, dhe nuk u afrohesh dot zyrave të kompanisë, se nuk të vjen policia, të vijnë këta”, tha Hoxha. /TPZ.al/
