TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Erisa Xhixho, deputetja e Partisë së Lirisë, e ka dënuar vendimin e qeverisë “Rama” për shndërrimin e universiteteve publike në IALPP, thënë shkurt, kthimin e tyre në fondacione.
Xhixho, në kritikën e saj kundër vendimit të datës 23 nëntor 2022, theksoi se “kjo qeveri tregoi edhe njëherë se arsimin nuk e ka prioritet, por vetëm PPP.”
“VKM e fundit, e cila parashikon tjetërsimin e universiteteve publike në fondacione, është goditja e radhës që i jepet arsimit nga qeveria e Edi Ramës – shkroi Xhixho në Fb.- Me Vendimin e Këshillit të Ministrave nr 741, datë 23.11.2022, pasuritë e paluajtshme të universiteteve publike, nga pronë publike shndërrohen në pronë të fondacionit.
Universitetet publike duke u kthyer në fondacione shndërrohen në pronë private lehtësisht të tjetërsueshme, duke ndryshuar statusin juridik të pronës.
Kjo VKM që vjen 7 vjet pas miratimit të ligjit për arsimin e lartë, është totalisht e paqartë dhe lë mundësi abuzimi nga qeveria e inceneratorëve.
Kjo qeveri, e cila nuk ka bërë asgjë për të frenuar mbylljen e dhjetëra degëve studimore në universitetet e vendit, ka injoruar hapur kërkesat e studentëve dhe pedagogëve dhe ka miratuar për arsimin një buxhet qesharak për 2023, më të ulëtin në rajon, tani ka vendosur të nxjerrë në shitje tempujt e dijes.
Ky rikonceptim i ri do të thellojë akoma më tej gjendjen e vështirë në të cilën ndodhen sot universitetet shqiptare. Në përpjekjen për mbijetesë, kostot do të shtohen duke rënduar mbi studentët dhe familjet e tyre. Qeveria e inceneratorëve dhe PPP-ve nuk e ka pasur kurrë prioritet arsimin. Ndaj nuk është habi që universitetet publike janë malli i radhës që ajo nxjerr në shitje. Duhet të bëhemi të gjithë bashkë ta ndalim këtë asgjësim të qëllimshëm të tyre!", përfundoi deputetja e PL.
