TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Drejtori i Arkivave të Shtetit, Ardit Bido, nxorri në një studio televizive një dokument ku pretendohet se ish-Mbreti Zog, mori me vete, gjatë arratisë nga Shqipëria në prill 1939, 250 mijë monedha floriri, që sot llogariten me një vlerë rreth 40 milionë dollarë. Kurse një historian tjetër tha se Zogu ishte i pasur që në vitet ’20 pa u vetëshpallur mbret, sepse bënte biznes me të huajt, kishte edhe dy llogari bankare dhe shumë sende të çmuara.
Drejtori i Kadastrës, Artan Lame, që më shumë merret me artefaktet dhe kostumet se me pronat e palegalizuara të shqiptarëve, shkoi edhe më tej, duke kërkuar nga familja mbretërore që të kthejë pasuritë që thuhet se u janë marrë shqiptarëve, ditën kur Italia pushtoi Shqipërinë. Këtë debat nipi i ish-mbretit Zog, Leka I, e ka quajtur pa vlerë, si ajo letra që thotë për florinjtë e gjyshit.
Mbi këtë debat të rinisur, gazetari dhe analisti Lutfi Dervishi, ka vënë në gojën e majmunit Kiko kërkesën sakrastike se cilat duhet të jenë çështjet që duhen hetuar me përparësi, nga pushtimi i Ilirisë nga Roma deri te abuzimet dhe mashtrimi në shpërndarjen e ndihmave të sjella nga Anglia gjatë Luftës së Dytë Botërore dhe këto hetime t’i kryejë SPAK-u.
Shënimi i Dervishit
Çështjet që duhen hetuar me përparësi…
I ngazëllyer nga dëshira e zjarrtë e popullit, e administratës dhe udhëheqjes politike për të hetuar çdo çështje që mund të ketë dëmtuar interesin publik të shqiptarëve;
I motivuar nga njoftimet për marrjen e arit nga Mbreti i Shqiptarëve Ahmet Zogu;
I frymëzuar nga protestat mbarëpopullore për të vënë drejtësinë në vend;
I brymosur më parimet e së drejtës zakonore dhe kushtetuese;
I bindur se pavarësisht kohës që kalon e drejta zhytet, por nuk mbytet
Me besimin se drejtësia (po ta lësh rehat) do të bëj punën e saj,
shpall si prioritare dhe urgjente listën e çështjeve që duhen hetuar sipas këtij rendi kronologjik:
1. Hetimin e incidentit që çoi në pushtimin e Ilirisë nga Roma. (Mbretëresha Teutë i pat dërguar (me të drejtë) senantit romak, një letër ku theksonte me forcë të drejtën e ilirëve për pirateri në detin Adriatik. Vrasja e dy ambasadorëve që dërgoi Roma shërbeu si casus belli për pushtim. Akuza për tradhëti të lartë. (viti 223-227 para Krishtit.
2. Hetimin e personave më precedentë në Europë që morën pjesë në Besëlidhjen e Lezhës; (viti 1444) indicia: raportet e ambasadorit të Venedikut/Venecias që ishte edhe ideatori dhe organizatori i Kuvendit. Akuza bazohet në ligjin për dekriminalizimin.
3. Hetimin nën akuzën për korruptim aktiv dhe pasiv të inspektorëve të Kontrollit të Lartë të Perandorisë nga Ali Pashë Tepelena (viti 1780-1822)
4. Hetimin e incidentit gjatë udhëtimit të Ismail bej Vlorës. Dyshohet se shtetasi Haki Tafa, me profesionin, karrocier që transportoi Ismail Qemalin në Vlorë nëse ka poseduar dokumentet e nevojshme apo ka qarkulluar pa lejë drejtimi. (viti 1912)
5. Hetimin për lobim korruptiv të Edith Durhamit (1911)
6. Hetimin e vendimeve të qeverisë së Vlorës dhe të qeverisë së Durrësit për të shpallur kryeqytet, qytetet respektive. Akuza për shpërdorim detyre dhe korrupsion. Dyshohet se vendimi është marrë nën presionin korruptiv duke qenë se këto dy qytete ishin qytete doganore (viti 1912-1913)
7. Hetimin e tenderit të uniformës së Princ Vidit. Akuza për shpërdorim detyre. (viti 1914)
8. Kush ishte oligarku nga Berati që financoi Kongresin e Lushnjës (viti 1920).
9. Hetimin për shpërdorimin e kredive dhe ndihmës italiane në procesin e Rindërtimit të Shqipërisë. (Viti 1928-1938)
10. Hetimin me dyshimin për fallsifikim të tapisë së shtëpisë ku u themelua partia (viti 1941)
11. Hetimin për abuzime dhe mashtrim në shpërndarjen e ndihmave të sjella nga Anglia gjatë Luftës së Dytë Botërore. Ka ende prova dhe dëshmitarë që kanë hedhur në masë këpucë të një këmbe. (viti 1942-1944)
Për shkak të ndjeshmërisë së lartë që kanë këto çështje në opinionin publik shqiptar dhe për faktin që pa hedhur dritë mbi këto krime nuk mund të ketë progres të Shqipërisë drejt BE-së, sugjeroj që hetimet të kryhen nga SPAK.
Hetimi i këtyre çështjeve do të ndriçojë dhe pastrojë historinë e Shqipërise dhe jo pseudo- aferat me pastruese, me incineratore, me agronë dhe mcgonë!
I juaji
Kiko
