TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Zjarret që përfshinë zonat e Kithaironas dhe Agios Nikolaos në Greqi kanë lënë pas një bilanc të rëndë mjedisor. Sipas një analize të ekipit FireHUB, deri më 2 gusht 2026 janë djegur rreth 126,310 hektarë, ndërsa vlerësimi është kryer përmes të dhënave satelitore dhe mjeteve të avancuara të analizës gjeohapësinore.
Të dhënat tregojnë se dëmet më të mëdha janë regjistruar në zonat pyjore dhe gjysmënatyrore, të cilat përbëjnë 83.64% të sipërfaqes së djegur. Ndërkohë, 15.05% e zonës së prekur përfshin toka bujqësore, ndërsa 1.31% sipërfaqe të urbanizuara.
Sa i përket intensitetit të zjarrit, analiza tregon se 38.15% e sipërfaqes është djegur me intensitet të ulët, 37.53% me intensitet të moderuar, 22.32% me intensitet të lartë dhe 2% me intensitet shumë të lartë.
Ndërkohë, situata në terren mbetet kritike. Autoritetet greke vijojnë të dërgojnë mesazhe emergjente përmes sistemit 112, duke urdhëruar evakuimin e banorëve në disa zona të Atikës Perëndimore, mes tyre Megara Industriale, Papa Perivoli, Kandili, Ano Vlychada dhe Agios Konstantinos, për shkak të avancimit të flakëve. Një vatër e re zjarri është raportuar edhe në zonën e Divrit, në rajonin e Ilias, ku janë angazhuar 27 zjarrfikës, 9 mjete zjarrfikëse, një ekip i specializuar i EMODE, si dhe katër avionë zjarrfikës për ndërhyrje nga ajri.
Në të njëjtën kohë, Divizioni i Hetimit të Zjarrvënieve pranë Departamentit të Zjarrfikësve po shqyrton një video të filmuar pranë Porto Germeno, e cila dyshohet se tregon zonën ku nisi zjarri në Agios Vasilios. Pamjet janë pjesë e hetimeve për zbardhjen e shkaqeve të shpërthimit të flakëve. Përballë pasojave të rënda të zjarreve, Shoqata Helenike e Bankave njoftoi masa mbështetëse për familjet e zjarrfikësve dhe pilotëve që humbën jetën gjatë operacioneve, duke përfshirë edhe faljen e detyrimeve të kredive ndaj katër bankave më të mëdha të vendit.
