TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Protesta qytetare në Tiranë ka shënuar 130 ditë të tubimeve dhe marshimeve kundër qeverisë. Pas marshimit në rrugët e kryeqytetit, protestuesit janë mbledhur sërish mbrëmjen e sotme para Kryeministrisë.
Tubimi është zhvilluar në një moment kur kryeministri Edi Rama ndodhej në ambientet e Kryeministrisë. Përpara godinës është vendosur kordoni policor, ndërsa efektivët kanë qëndruar përballë protestuesve të pranishëm në shesh.
Protesta ka vijuar me thirrje kundër qeverisë dhe kërkesa për dorëheqjen e kryeministrit Edi Rama.
Gjatë protestës ka ndodhur edhe një incident pranë godinës së Kryeministrisë. Një automjet ka dalë nga ambientet e saj, ndërsa aktivisti Edison Lika është afruar dhe e ka goditur me vezë.
Pas incidentit, Lika është larguar me vrap. Efektivët e policisë, të cilët ndodheshin në zonë, janë vënë në ndjekje të tij dhe më pas e kanë arrestuar.
Incidenti ka ndodhur pasi protestuesit ishin rikthyer para Kryeministrisë pas marshimit.
Policia vijon të mbajë të rrethuar zonën pranë Kryeministrisë, ndërsa protesta vijon me pjesëmarrjen e qytetarëve të mbledhur në shesh.
