TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një grua 38-vjeçare në Brazil është dënuar me burg pasi u shtir për më shumë se një vit si një vajzë 12-vjeçare, duke mashtruar një familje që e kishte strehuar dhe trajtuar si vajzën e tyre.
Amanda Maria Souza de Oliveira u shpall fajtore në Santa Catarina për mashtrim dhe përdorim të identitetit të rremë. Gjykata e dënoi me 1 vit, 6 muaj e 10 ditë burg për mashtrimin, si dhe 4 muaj e 18 ditë ndalim për përdorimin e identitetit të rremë, me regjimin fillestar gjysmë të hapur. Vendimi la në fuqi edhe paraburgimin e saj, ndaj ajo nuk do të mund ta apelojë vendimin në liri.
U paraqit si “Gabriele”, 12 vjeçe
Sipas hetimeve, Souza përdori identitetin e rremë “Gabriele” dhe fillimisht iu drejtua një komuniteti fetar duke pretenduar se ishte 18 vjeçe dhe po kërkonte punë. Më pas historia ndryshoi: ajo pretendoi se ishte vetëm 11 ose 12 vjeçe, se kishte përjetuar abuzime dhe se kishte probleme shëndetësore.
Për të shpjeguar faktin që dukej dukshëm më e rritur, ajo pretendonte se gjatë fëmijërisë ishte detyruar të merrte trajtime hormonale. Ajo deklaronte gjithashtu se ishte autike dhe përdorte një mënyrë të foluri dhe sjelljeje që synonte të krijonte përshtypjen e një fëmije.
Familja në Joinville e besoi historinë dhe e mori në shtëpi. Souza qëndroi atje për 14 muaj, gjatë të cilëve familja mbuloi nevojat e saj, përfshirë ushqimin, strehimin, transportin, ilaçet dhe kujdesin e vazhdueshëm. Madje, familja organizoi edhe një festë për ditëlindjen e saj të pretenduar të 12-të.
Sipas dokumenteve të çështjes, familja pagoi edhe ilaçe me kosto të lartë për të.
Si u zbulua mashtrimi?
Farsa nisi të zbulohej kur një e afërme e familjes filloi të dyshonte për historinë e “vajzës”. Ajo kërkoi në internet informacione për raste të ngjashme dhe gjeti raportime të mëparshme që e lidhnin Souza-n me mashtrime të tjera.
Kur policia shkoi për ta arrestuar, gruaja që familja besonte se ishte 12 vjeçe ishte në dhomën e saj, e rrethuar nga kukulla dhe vizatime. Sipas një raportimi të Washington Post, në momentin kur policia i tha emrin e saj të vërtetë, ajo kaloi nga zëri fëmijëror në një ton normal të një gruaje të rritur.
Souza u arrestua më 2 qershor në Joinville.
Dyshohet se e kishte përdorur të njëjtën skemë edhe më parë
Rasti nuk duket të jetë i izoluar. Hetimet braziliane kanë zbuluar se Souza dyshohet se kishte përdorur identitete dhe histori të ndryshme për t'u paraqitur si e mitur në disa raste të tjera.
Sipas mediave braziliane, ajo kishte përdorur emra të ndryshëm, përfshirë Gabriele, Ana Clara, Maria Eduarda, Beatriz dhe Maria Clara, ndërsa hetimet për raste të ngjashme datojnë të paktën që nga viti 2018.
Ajo është hetuar ose përfshirë në procedime në disa shtete të Brazilit, mes tyre São Paulo, Rio de Janeiro, Minas Gerais, Rio Grande do Sul, Goiás, Paraná dhe Ceará.
Në Paraná, policia e ka hetuar për një tjetër rast ku ajo dyshohet se u paraqit si një 13-vjeçare me leucemi në fazë terminale, duke mashtruar një grup prej 12 personash që bënin pjesë në një komunitet lutjesh. Rasti ishte regjistruar në vitin 2022 dhe u rihap pasi anëtarët e grupit e njohën nga lajmet për arrestimin e saj në Santa Catarina.
Në këtë rast, policia e Paraná-s e ka marrë në pyetje dhe e ka akuzuar për mashtrim, ndërsa Souza i ka mohuar akuzat.
Një nga viktimat e këtij mashtrimi kishte krijuar një lidhje të fortë emocionale me “vajzën” dhe madje kishte bërë tatuazh emrin e rremë që Souza përdorte në atë kohë.
Mbrojtja: Ka probleme psikiatrike
Mbrojtja e Souza-s ka kundërshtuar akuzat dhe ka kërkuar vlerësime të shëndetit mendor. Avokatët pretendojnë se ajo ka probleme psikiatrike dhe se duhet të trajtohet, ndërsa disa raporte mjekësore të çështjes janë nën sekret gjyqësor.
Vetë mbrojtja ka pranuar se Souza ka përdorur identitete të rreme, por argumenton se kjo ishte një mënyrë mbijetese dhe jo një skemë mashtrimi për përfitim financiar. Avokatët kanë deklaruar se do ta apelojnë vendimin.
Gjykata, megjithatë, arriti në përfundimin se ajo kishte vepruar me vetëdije për të krijuar një identitet të rremë dhe për të përfituar nga familja që e kishte strehuar.
Rasti ka marrë vëmendje të madhe në Brazil dhe jashtë tij për shkak të mënyrës së pazakontë të mashtrimit dhe dyshimeve se gruaja kishte përdorur të njëjtën skemë për vite me radhë, duke ndryshuar emrin dhe historinë e saj për t'u paraqitur si fëmijë në nevojë.
