TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Shtetet e Bashkuara i kanë paralajmëruar autoritetet polake se Rusia mund të jetë duke përgatitur një provokim të armatosur kundër Polonisë, me synimin për të testuar vendosmërinë e NATO-s, raporton gazeta britanike The Telegraph.
Sipas raportit, Uashingtoni ka informuar Varshavën se një sulm i mundshëm mund të realizohet përmes raketave ose dronëve ndaj infrastrukturës kritike polake, apo edhe me një inkursion të kufizuar të ushtarëve rusë në territorin polak, i cili njëkohësisht është territor i NATO-s.
Burime pranë presidentit polak Karol Nawrocki i thanë medias polake Onet se një skenar i tillë mund të ndodhë brenda pak muajsh dhe do të kishte si qëllim krijimin e tensioneve dhe ushtrimin e presionit ndaj aleatëve perëndimorë të Ukrainës për të reduktuar ose pezulluar ndihmën ushtarake dhe ekonomike për Kievin.
“SHBA-të informojnë sistematikisht Poloninë për çdo plan të ri rus për një sulm konvencional në krahun lindor të NATO-s, nga i cili Polonia nuk është në asnjë mënyrë e përjashtuar”, citohet të ketë deklaruar një burim pranë presidentit polak.
Sipas shërbimeve polake të sigurisë, një sulm konvencional rus, përfshirë një pushtim të kufizuar tokësor, konsiderohet një mundësi reale. Moska mund të përpiqet ta paraqesë një veprim të tillë si një aksident ose si pasojë e një gabimi teknik.
Raporti përmend edhe skenarë të tjerë të mundshëm, si sulme me dronë ndaj termocentraleve dhe infrastrukturës kritike, apo fluturime provokuese të avionëve luftarakë që do ta detyronin Poloninë të aktivizonte sistemet e saj të mbrojtjes ajrore.
Burime të inteligjencës polake kanë paralajmëruar se në skenarin më ekstrem mund të ndodhë një “sulm hibrid” në zonën kufitare, ku mund të përfshihen ushtarë rusë dhe bjellorusë. Sipas tyre, Rusia mund të pretendojë se një inkursion i tillë ka ndodhur për shkak të një gabimi në sistemin GPS ose të inskenojë një operacion të rremë shpëtimi për një helikopter të rrëzuar.
Sipas burimeve të cituara nga Onet, Kremlini mund të llogarisë që SHBA-ja dhe aleatët të zgjedhin negociatat në vend të një reagimi ushtarak. Në një skenar të tillë, presidenti rus Vladimir Putin do ta konsideronte tërheqjen e forcave pas negociatave si një fitore politike, ndërsa një nga kërkesat e mundshme të Moskës mund të ishte ndërprerja e ndihmës perëndimore për Ukrainën.
Ndërkohë, burime nga vendet baltike i thanë The Telegraph se rreziku i një provokimi rus ndaj një prej shteteve baltike mbetet serioz. Sipas tyre, një operacion i tillë mund të niset nga rajoni i Kaliningradit, ku Rusia mban të dislokuara edhe armë bërthamore.
Raporti thekson gjithashtu se gjatë vitit të fundit Moska duket se ka testuar vazhdimisht aftësitë mbrojtëse të NATO-s përmes ndërhyrjeve të përsëritura të dronëve dhe avionëve në hapësirën ajrore të aleancës.
Në të njëjtën linjë, një raport i publikuar nga Instituti Ndërkombëtar për Studime Strategjike (IISS) arrin në përfundimin se Rusia mund të ketë përdorur anije të flotës së saj “në hije” për të lëshuar dronë mbi Evropë, duke shkaktuar ndërprerje të fluturimeve civile, ndërsa njëkohësisht monitoronte objektet ushtarake dhe testonte sistemet e mbrojtjes ajrore të vendeve të NATO-s. Sipas raportit, gjatë periudhës 2024–2026 janë dokumentuar 144 incidente me dronë në vende si Gjermania, Franca, Belgjika, Holanda, Mbretëria e Bashkuar dhe Danimarka.
