TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Bashkëthemeluesi i Microsoft, Bill Gates, ka deklaruar se beson se Jeffrey Epstein po përpiqej të mblidhte informacione personale për ta shantazhuar, megjithëse një gjë e tillë nuk ndodhi kurrë.
Deklaratat u bënë gjatë një dëshmie me dyer të mbyllura para Komitetit të Dhomës së Përfaqësuesve të SHBA-së më 10 qershor, transkripti i së cilës u publikua së fundmi.
“Nuk ishte shantazh, por dukej sikur po shkonte në atë drejtim”, tha Gates, duke iu referuar komunikimeve që kishte pasur me Epstein.
Sipas miliarderit 70-vjeçar, Epstein ishte në dijeni të marrëdhënieve të tij jashtëmartesore me dy gra dhe në disa email-e krijohej përshtypja se ai mund të përpiqej ta përdorte këtë informacion. Gates theksoi se nuk i kishte njohur këto gra përmes Epstein dhe se i kishte bërë të qartë se nuk kishte asnjë mënyrë për të përfituar prej këtij informacioni.
Ai pranoi gjithashtu se kishte pasur disa lidhje jashtëmartesore gjatë martesës me Melinda French Gates, gjë që, sipas tij, ia kishte rrëfyer para divorcit të tyre në vitin 2021.
Gates shpjegoi se njohja me Epstein kishte nisur në vitin 2011 për shkak të interesit të këtij të fundit për të mbështetur iniciativa filantropike në fushat e shëndetësisë dhe arsimit global. Sipas tij, Epstein pretendonte se mund të siguronte miliarda dollarë financime nga rrjeti i tij i kontakteve.
“Që në fillim ia bëra të qartë se ai nuk do të kishte asnjë rol në projektet tona dhe nuk do të përfitonte kompensim financiar”, deklaroi Gates.
Ai tha se mes viteve 2011 dhe 2012 ishte takuar pesë herë me Epstein dhe se diskutimet kishin qenë të përqendruara kryesisht te filantropia. Kontakti mes tyre vazhdoi deri në vitin 2014, kur Gates kuptoi se premtimet për mbështetje financiare nuk po materializoheshin dhe vendosi të distancohej.
Gates shtoi se nuk e kishte vizituar kurrë ishullin privat të Epstein dhe se, megjithëse ishte në dijeni se ai ishte dënuar për krime, nuk kishte hetuar në detaje natyrën e tyre.
“Ndoshta duhej ta kisha hetuar më shumë”, tha ai, duke përsëritur se njohja me Epstein mbetet një nga pendesat më të mëdha të jetës së tij.
