TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Sot në Pallatin Diriyah në Riad të Arabisë Saudite,po mbahen bisedimet bisedimet midis zyrtarëve të lartë amerikanë dhe rusë në lidhje me mundësinë e rivendosjes së marrëdhënieve diplomatike dhe kërkimin e mënyrave për zgjidhjen paqësore të luftës në Ukrainë.
Pala amerikane, sipas deklaratave të zyrtarëve, sqaroi se takimi i sotëm nuk përbën fillimin e negociatave formale, por një përpjekje të parë për të përcaktuar nëse Rusia është “serioze” në synimin e saj për t’i dhënë fund armiqësive.
Nga ana e saj, Moska e ka bërë të qartë se prioriteti i saj është normalizimi gradual i marrëdhënieve me Shtetet e Bashkuara të Amerikës.
Takimi mes Sekretarit Amerikan të Shtetit Marco Rubio dhe homologut të tij rus Sergei Lavrov fokusohet në rivendosjen e komunikimit diplomatik midis dy vendeve, me qëllimin përfundimtar krijimin e kushteve për bisedimet e paqes që mund të çojnë në përfundimin e konfliktit në Ukrainë.
“Shpresojmë që Shtetet e Bashkuara të dëgjojnë me kujdes pozicionin e Moskës gjatë bisedimeve,” tha kreu i fondit sovran të pasurisë së Rusisë, Kirill Dmitriev, i cili luajti një rol kyç në kontaktet fillestare Rusi-SHBA gjatë presidencës Trump.
Mungesa e Ukrainës
Megjithatë, mungesa e Kievit dhe liderëve evropianë në këto bisedime ka shkaktuar reagime të forta.
Presidenti ukrainas Volodymyr Zelensky ka bërë qartë se vendi i tij “nuk mund të njohë asnjë marrëveshje të bërë për ne, pa ne në tryezë”. Sot, presidenti ukrainas ndodhet në Turqi.
Irani në sfond
Në të njëjtën kohë, agjencia ruse Tass raporton se fillimi i bisedimeve nuk do të ndikojë në bashkëpunimin e Rusisë me Teheranin. Sipas zëdhënësit të Kremlinit, Dmitry Peskov, Rusia mbetet e gatshme të mbështesë Iranin në zgjidhjen e çështjeve që lidhen me programin e tij bërthamor.
Qëndrimi amerikan dhe pritshmëritë ndërkombëtare
Zëdhënësja e Departamentit të Shtetit, Tammy Bruce, u tha gazetarëve në Riad se bisedimet janë një “hap i parë” në vlerësimin e gatishmërisë së Rusisë për një proces paqeje.
“Ky takim ka të bëjë me të kuptuarit nëse ka një bazë, nëse ky hap i parë mund të çojë në bisedime reale dhe nëse interesat mund të gjejnë gjuhën e përbashkët,” vuri në dukje ai.
Nga ana e tij, Kremlini la të kuptohet se bisedimet nuk do të shqyrtojnë vetëm situatën në Ukrainë, por do të diskutojnë “të gjithë kompleksin e marrëdhënieve ruso-amerikane”. Mundësia e një takimi të ardhshëm midis presidentëve Putin dhe Trump pritet gjithashtu të jetë temë e këtij diskutimi më të gjerë, me kusht që të arrihet përparim thelbësor në frontin diplomatik.
Bisedimet në Riad po zhvillohen në një moment kritik, me komunitetin ndërkombëtar që monitoron nga afër çdo zhvillim që mund të hapë rrugën për t’i dhënë fund një prej konflikteve më shkatërruese në historinë moderne evropiane.
