TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Qendra “Mbreti Salman” për Ndihmë dhe Veprimtari Humanitare (KSrelief) e Mbretërisë së Arabisë Saudite ka nënshkruar një marrëveshje bashkëpunimi me Komunitetin Mysliman të Shqipërisë për zbatimin e një projekti humanitar në mbështetje dhe përkujdesje të fëmijëve jetimë në Shqipëri gjatë vitit 2026.
Marrëveshja u nënshkrua përmes një takimi online dhe përfaqëson një tjetër nismë të Mbretërisë së Arabisë Saudite në fushën e ndihmës humanitare dhe sociale në Shqipëri.
Sipas Agjencisë Saudite të Shtypit (SPA), marrëveshja u nënshkrua nga ndihmësdrejtori i përgjithshëm i Qendrës “Mbreti Salman” për Operacionet dhe Programet, inxhinier Ahmed bin Ali Al-Baiz.
Projekti parashikon mbështetjen e 500 fëmijëve jetimë në 20 bashki të Shqipërisë. Në kuadër të tij, secili përfitues do të marrë një mbështetje mujore prej 72 dollarësh amerikanë, ndërsa paketa e ndihmës përfshin gjithashtu veshje dimërore dhe materiale shkollore.
Programi nuk kufizohet vetëm në mbështetjen materiale. Ai parashikon edhe ofrimin e shërbimeve të mbështetjes psikologjike dhe sociale, si dhe organizimin e takimeve javore për fëmijët përfitues. Këto aktivitete do të fokusohen në edukimin, sjelljen dhe forcimin e vlerave shoqërore.
Nisma synon të mbështesë jo vetëm fëmijët jetimë, por edhe familjet e tyre dhe kategori të tjera në nevojë, në zona të ndryshme të Shqipërisë.
Projekti është pjesë e veprimtarisë humanitare dhe të ndihmës që Mbretëria e Arabisë Saudite zhvillon përmes Qendrës “Mbreti Salman” për Ndihmë dhe Veprimtari Humanitare (KSrelief), në kuadër të programeve të saj për përkujdesjen ndaj fëmijëve jetimë dhe përmirësimin e kushteve të tyre të jetesës në vende mike dhe vëllazërore.
Marrëveshja me Shqipërinë e vendos kështu KSrelief në qendër të një programi të drejtpërdrejtë të ndihmës saudite për fëmijët dhe familjet në nevojë, duke ndërthurur mbështetjen financiare me atë arsimore, sociale dhe psikologjike.
