TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Rusia ka përshëndetur Strategjinë e re të Sigurisë Kombëtare të Presidentit amerikan Donald Trump, duke e quajtur atë “më së shumti në përputhje” me vizionin e Moskës.
Dokumenti 33-faqesh, i publikuar nga administrata amerikane këtë javë, sugjeron se Europa po përballet me “zhdukje civilizimi” dhe nuk e paraqet Rusinë si kërcënim për SHBA-të.
Luftimi i ndikimit të huaj, ndalimi i migracionit masiv dhe refuzimi i praktikës së perceptuar të BE-së për “censurë” përmenden si prioritete të tjera në raport.
Disa zyrtarë të BE-së dhe analistë kanë kundërshtuar strategjinë, duke vënë në pikëpyetje fokusin e saj tek liria e shprehjes dhe duke e krahasuar atë me gjuhën e përdorur nga Kremlini.
“Rregullimet që po shohim… janë kryesisht në përputhje me vizionin tonë,” tha zëdhënësi i Kremlinit Dmitry Peskov në një intervistë të publikuar nga agjencia shtetërore ruse Tass të dielën.
“Ne e konsiderojmë këtë një hap pozitiv,” shtoi ai, duke theksuar se Moska do të vazhdojë ta analizojë dokumentin përpara se të arrijë në përfundime të forta.
Strategjia përdor një gjuhë më të butë ndaj Rusisë, gjë që zyrtarët e BE-së druhen se mund të dobësojë qëndrimin e saj ndaj Moskës në kohën që po ushtrohen presione për t’i dhënë fund luftës në Ukrainë.
Në dokument, fajësohet BE-ja për bllokimin e përpjekjeve amerikane për t’i dhënë fund konfliktit dhe thuhet se SHBA duhet të “rivendosin stabilitetin strategjik me Rusinë”, gjë që do të “stabilizonte ekonomitë evropiane”.
Duket se mbështet përpjekjet për të ndikuar politikën në kontinent, duke vënë në dukje se politika amerikane duhet të prioritarizojë “rezistencën ndaj trajektores aktuale të Europës brenda vetë vendeve evropiane”.
Raporti i ri kërkon gjithashtu rivendosjen e “identitetit perëndimor” dhe pretendon se Europa do të jetë “e panjohshme për 20 vjet ose më pak” dhe se problemet e saj ekonomike “zbehen përballë perspektivës shumë më të fortë të zhdukjes civilizuese”.
“Nuk është aspak e qartë nëse disa vende evropiane do të kenë ekonomi dhe ushtri mjaftueshëm të forta për të mbetur aleatë të besueshëm,” thuhet në dokument.
Në kontrast të theksuar, dokumenti lavdëron ndikimin e “partive patriotike evropiane” dhe thotë se “Amerika i inkurajon aleatët e saj politikë në Europë të promovojnë këtë ringjallje të shpirtit”.
Ndërsa BE është përfshirë në bisedime të vazhdueshme me administratën Trump për të përcaktuar një marrëveshje paqeje në Ukrainë, disa zyrtarë theksuan marrëdhënien e tyre të qëndrueshme me SHBA-të, ndërsa ngritën “pyetje” për dokumentin.
“SHBA do të mbetet aleati ynë më i rëndësishëm në aleancën [Nato]. Kjo aleancë, megjithatë, fokusohet në trajtimin e çështjeve të politikës së sigurisë,” tha të premten ministri gjerman i Punëve të Jashtme, Johann Wadephul.
“Besoj se çështjet e lirisë së shprehjes apo organizimi i shoqërive tona të lira nuk i përkasin [strategjisë], të paktën jo kur bëhet fjalë për Gjermaninë.”
Në një postim në rrjetet sociale drejtuar “miqve të tij amerikanë”, Kryeministri polak Donald Tusk tha se “Europa është aleati juaj më i afërt, jo problemi juaj” dhe vuri në dukje “armiqtë tanë të përbashkët”.
“Kjo është e vetmja strategji e arsyeshme për sigurinë tonë të përbashkët. Përveç nëse diçka ka ndryshuar.”
Ndërkohë, ish-kryeministri suedez Carl Bildt shkroi se dokumenti “pozicionohet në të djathtë të ekstremit të djathtë”.
Administrata Trump ka kultivuar lidhje me partinë e ekstremit të djathtë AfD në Gjermani, e cila është klasifikuar si ekstremiste e djathtë nga inteligjenca gjermane.
Duke promovuar mesazhin “America First”, strategjia thotë se SHBA synon të godasë anijet e dyshuara për trafik droge në Detin e Karaibeve dhe Oqeanin Paqësor lindor, duke marrë në konsideratë edhe mundësinë e veprimit ushtarak në Venezuelë.
SHBA gjithashtu u bën thirrje Japonisë, Koresë së Jugut, Australisë dhe Tajvanit të rrisin shpenzimet e mbrojtjes.
Demokratët në Kongres paralajmëruan se dokumenti mund të dëmtojë rëndë marrëdhëniet e jashtme të SHBA-ve.
Përfaqësuesi Jason Crow nga Kolorado, i cili është pjesë e komiteteve të Dhomës së Përfaqësuesve që mbikëqyrin inteligjencën dhe forcat e armatosura, e quajti strategjinë “katastrofike për reputacionin e Amerikës në botë”.
Përfaqësuesi i Nju Jorkut, Gregory Meeks, tha se ajo “hedh poshtë dekada të lidershipit amerikan të bazuar në vlera”./BBC
