TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Partia e Lirisë denoncoi sot fryrjen e administratës në prag të zgjedhjeve parlamentare të 11 majit.
Sekretari i Përgjithshëm i Partisë së Lirisë Tedi Blushi tha se shtimi i numrit të punonjësve në sektorin publik është bërë për shfrytëzimin e vendeve të punës për të kontrolluar votën dhe procesin zgjedhor.
“Fryrja e paligjshme dhe politike e administratës publike, me rreth 4000 patronazhistë, në prag të zgjedhjeve të 11 Majit, është një krim i shëmtuar elektoral”, tha Blushi.
“Ky shtim i panevojshëm i numrit të punonjësve në sektorin publik në limitet e sanksionuara nga Kodi Zgjedhor, nuk ka patur asnjë arsye funksionale apo shërbimi, por vetëm një objektiv të qartë: shfrytëzimin e vendeve të punës për të kontrolluar votën dhe procesin zgjedhor të 11 Majit”, u shpreh Blushi.
Blushi theksoi se “11 Maji do të kthehet në një referendum mbarëpopullor për të çliruar njëherë e përgjithmonë administratën publike nga fuksat dhe patronazhistët dhe për ta kthyer shtetin vetëm në shërbim të qytetarit”.
“Partia e Lirisë u bën thirrje të gjithë punonjësve të shtetit, të jenë shumë të kujdesshëm, të mos shkelin ligjin dhe të mos u binden verbërisht urdhrave të paligjshëm politikë për të firmosur shkresa dhe akte korruptive sepse do të marrin më qafë veten e tyre!”, tha Blushi.
Sipas Blushit “çdo punonjës i administratës, duhet të respektojë me rigororiztet statusin e nëpunësit civil dhe të mos lejojë asnjë drejtor apo ministër ta përdorë si vegël për nënshkrimin e akteve të paligjshme apo favorizimin e proceseve të pandershme”.
“Çdokush që shkel ligjin dhe Kushtetën do të mbajë përgjegjësi personale”, tha Blushi.
