TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Zyrtari i Federatës Shqiptare të Futbollit, Arben Dervishaj, i cili ndodhet në qeli si i përfshirë në aferën e inceneratorëve, ka kërkuar lirinë në Gjykatën e Lartë.
Dervishaj ka mbajtur pozicionin e supervizorit të punimeve në inceneratorin e Fierit dhe i është drejtuar Gjykatës së Lartë me rekurs. Dervishaj pretendon se nuk ekzistojnë kushtet dhe kriteret ligjore për t’u hetuar nën masën e sigurimit arrest në burg.
Ai kishte kërkuar disa herë ndryshim mase në dy shkallët e Gjykatës së Posaçme, por kërkesat e tij janë rrëzuar.
GJKKO pranoi më parë kërkesën për caktimin e ekspertëve mjekësor që do të përcaktonin rrezikshmërinë për të qëndruar apo jo prapa hekurave. Mësohet se 3 mjekët ekspertë, u paraqitën më herët në gjykate, për të bërë vlerësimet e tyre.
Sipas hetimeve të SPAK, Arben Dervishaj, zyrtari i FSHF-së, në rolin e supervizorit rezulton se me kompaninë e ti ka konfirmuar se janë kryer punimet në inceneratorin e Fierit ndërkohë që nga hetimet e thelluara ka rezultuar që sitaucionet e punimeve nuk kanë qenë si janë deklaruar nga ana e Dervishajt.
Ai ka përfituar mbi 740 mijë dollarë ose 744 milionë lekë të vjetra për konsulencën e dhënë për inceneratorët, pronarit të kompanive të Klodian Zotos.
