TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Sistemi arsimor shqiptar po përballet me pabarazi të dukshme mes qarqeve, ku raporti mes nxënësve dhe mësuesve ndryshon ndjeshëm nga një zonë në tjetrën.Në kryeqytet, një mësues kujdeset mesatarisht për 13 nxënës në shkollat private dhe rreth 20 në ato publike, duke mundësuar një mësim më të personalizuar. Por në jug, situata është krejt tjetër.
Në Gjirokastër, raporti shkon deri në 25 nxënës për një mësues në shkollat private, ndërsa në ato publike bie në rreth 10. Edhe në Berat, mësuesit në sistemin privat përballen me 23 nxënës për klasë, krahasuar me 11 në publik.Këto diferenca tregojnë se cilësia e arsimit varet gjithnjë e më shumë nga vendndodhja dhe nga mundësitë ekonomike të familjeve, sesa nga një standard i unifikuar kombëtar.
Specialistët e fushës theksojnë se shpërndarja e pabarabartë e mësuesve, mungesa e investimeve në zonat e thella dhe diferencat në infrastrukturë po ndikojnë ndjeshëm në cilësinë e mësimdhënies. Në qarqet me popullsi më të madhe, si Tirana dhe Durrësi, konkurenca mes institucioneve arsimore ka çuar në klasa më të vogla dhe kujdes më të madh ndaj nxënësve. Ndërsa në qarqe më të vogla, mungesa e stafit pedagogjik dhe e mbështetjes financiare po përkeqëson rezultatet.
Një mësues që ka përballë më shumë se 20 nxënës e ka të vështirë të ofrojë vëmendje individuale, duke ndikuar në cilësinë e mësimit dhe motivimin e fëmijëve. Ekspertët paralajmërojnë se këto dallime mund të thellojnë më tej hendekun arsimor mes veriut e jugut, dhe mes zonave urbane e rurale, nëse nuk merren masa për një shpërndarje më të drejtë të burimeve njerëzore dhe financiare.
