TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Një operacion anti-drogë është ndërmarrë në Shqipëri, Itali, Mal të Zi dhe Spanjë ku janë lëshuar 38 urdhër arreste dhe janë sekuestruar disa miliona euro pasuri.
Ky operacion është vazhdim i hetimeve të operacioneve “Shefi” e “Kulmi” ekzekutuar në 2018 e 2020 nga Drejtoria e Anti-mafies Italiane të Barit.
Urdhri i nënshkruar nga gjyqtari i Tribunalit të Posaçëm Kundër Korrupsionit dhe Krimit të Organizuar të Tiranës u lëshua në dispozicion të Prokurorisë Speciale Kundër Korrupsionit dhe Krimit të Organizuar të Tiranës dhe Drejtorisë së Anti-mafias së Barit , në koordinim e Eurojust.
Gjithashtu arrestimet janë kryer me ndihmën ndërkombëtare të zyrës Ndërlidhëse të Tiranës dhe Policisë Shqiptare, si pjesë e një Ekipi të Përbashkët Hetimor.
Ndërkohë gjatë hetimit janë ngritur edhe akuza për korrupsion, abuzim me detyrën dhe pastrim parash. Në mesin e të arrestuarve dhe të hetuarve janë edhe prokurori i Vlorës Maksim Sota, si dhe zyrtarë të tjerë të shtetit shqiptar.
Mësohet se ky hetim për trafik droge është nisur nga prokuroria për Krimet e Rënda në vitin 2018, edhe është hetuar nga një prokuror që aktualisht është pjesë e SPAK.
Ndaj Sotës është vendosur masë sigurie arrest në shtëpi nën dyshimet për korrupsion.
Në mesin e të arrestuarve janë edhe 5 zyrtarë të policisë së shtetit, duke nisur nga ish nëndrejtori i Policisë së Vlorës, një ish zyrtar i policisë së Fierit dhe zyrtarë në policinë e Tiranës.Nga 38 urdhër-arrestet, 28 të arrestuar nga SPAK në Shqipëri, 10 të arrestuar më herët.
Emrat:
Të arrestuar janë: Maksim Sota, prokuror në Vlorë; Ilirjan Balla, shefi i Seksionit Kundër Trafiqeve në Drejtorinë e Përgjithshme të Policisë; Festim Lelaj, ish-oficer policie; Saimir Kurti, drejtor i Zyrës së Punës në Kavajë. Ata janë lënë në arrest shtëpie.
Ilirjan Balla, lindur në Berat, më herë ka mbajtur detyrat e Zv.drejtorit për Hetimin e Krimeve dhe Sigurinë në Policinë e Dibrës dhe të Zv.drejtorit për Hetimin e Krimeve dhe Sigurinë në Policinë e Shkodrës.
Operacioni ndërkombëtar synonte të godiste përveç trafikantëve të drogës nga Shqipëria në brigjet e Pulias e përtej, edhe fenomenet e korrupsionit dhe të abuzimit me detyrën.
