TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti i Koresë së Jugut, Lee Jae Myung, ka bërë thirrje të shtunën për rifillimin e dialogut me Korenë e Veriut, duke propozuar një qasje të re që synon bashkëjetesën paqësore dhe uljen e tensioneve në Gadishullin Korean.
Në një fjalim me rastin e përvjetorit të çlirimit të Koresë nga sundimi kolonial japonez, Lee tha se dy Koretë duhet të zhvillojnë bisedime për të ndërtuar një marrëdhënie të bazuar në bashkëjetesë dhe jo në përpjekjen për të ndryshuar sistemin e njëra-tjetrës.
Ai kërkoi gjithashtu dialog me Korenë e Veriut dhe palët e tjera të interesuara për t'i dhënë fund Luftës së Koresë, e cila përfundoi në vitin 1953 me një armëpushim, por jo me një traktat paqeje.
Sipas Lee, negociatat mund të përfshijnë edhe diskutime mbi masa për kufizimin e aftësive bërthamore të Phenianit.
Presidenti koreanojugor tha se Seuli do të ndërmarrë hapa për uljen graduale të tensioneve dhe do të forcojë mekanizmat mbrojtës për të parandaluar që përplasjet të shndërrohen në një konflikt më të gjerë.
Megjithatë, marrëdhëniet mes dy Koreve mbeten në një pikë të tensionuar. Udhëheqësi i Koresë së Veriut, Kim Jong Un, ka braktisur politikën tradicionale të ribashkimit dhe e ka cilësuar Korenë e Jugut si shtetin më armiqësor ndaj Phenianit.
Koreja e Veriut ka refuzuar më parë ofertat për dialog të administratës Lee, ndërsa ka kritikuar edhe planet ushtarake të Seulit dhe stërvitjet e përbashkëta SHBA–Kore e Jugut, të cilat i konsideron provokime.
Në fjalimin e tij, Lee foli edhe për marrëdhëniet me Japoninë, duke kërkuar që të dyja vendet të përballen me të kaluarën, por të mos lejojnë që ajo të pengojë bashkëpunimin në të ardhmen.
Ai tha se shpreson të nisë një periudhë të re 60-vjeçare paqeje dhe prosperiteti me Japoninë, duke e cilësuar atë një “fqinj të ngushtë”.
Thirrja e Lee vjen në një moment kur Gadishulli Korean mbetet një nga zonat më të tensionuara të Azisë, me programin bërthamor dhe raketor të Phenianit në qendër të përplasjeve me Seulin dhe Uashingtonin.
