TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Siç ishte paralajmëruar një ditë më parë, protesta qytetare ka hyrë sot në një fazë të re përshkallëzimi. Në ditën e 94-të të qëndresës kundër qeverisë dhe kryeministrit Edi Rama, protestuesit kanë ndryshuar skenarin e marshimeve të mëparshme, duke u pozicionuar në një nga hyrjet anësore të Kryeministrisë, pranë Piramidës.
Qytetarët kanë bllokuar hyrjen me qëllim pengimin e daljes, pasi kanë mësuar se kryeministri Edi Rama ndodhet brenda ambienteve të institucionit.
“Dil në bulevard!”, është thirrja që protestuesit i kanë drejtuar kryeministrit, ndërsa vijojnë të qëndrojnë përpara godinës dhe të kërkojnë që Rama të dalë përballë tyre në bulevard.
Ndryshe nga netët e tjera, kur protestuesit marshonin drejt Kryeministrisë dhe qëndronin përpara saj, këtë herë ata janë vendosur te një prej hyrjeve anësore, duke penguar kalimin.
Situata ka vënë në lëvizje edhe forcat e Policisë së Shtetit, të cilat janë pozicionuar rreth godinës së Kryeministrisë dhe në ambientet përpara saj, duke monitoruar situatën dhe në përpjekje për të shmangur bllokimin e hyrjeve.
Ndërkohë, protesta ka penguar edhe daljen e kryeministrit Edi Rama nga godina. Automjeti i tij raportohet se ndodhej i ndezur pranë hyrjes ku janë pozicionuar qytetarët.
Protesta vijon mes thirrjeve kundër qeverisë dhe kërkesës së protestuesve që kryeministri Rama të dalë përballë tyre në bulevard.
