TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Ish-deputetja e LSI-së, Silva Caka thotë se kompania Illyrian Guard është policia private e Edi Ramës.
Përmes një postimi në rrjetet sociale, Caka thotë se struktura e këtij shërbimi u refuzua edhe nga ambasadat e huaja. Referuar një emisioni investigativ, Caka shprehet se rekrutimet për këtë strukturë bëhen në mënyrë korruptive.
Ish-deputetja ngre disa pyetje, ndërsa thotë se kjo lloj strukture do t’i shërbejë institucioneve të rilindjes.
“Illyrian Guard u konceptua gabim që prej fillimit, për shkak të mbivendosjes, dyzimit dhe denatyralizimit të kompetencave që duhet të ketë një strukturë policore.
Shërbimet e kësaj strukture u refuzuan nga ambasadat e huaja në Shqipëri, pikërisht për mungesën e besimit që kjo strukturë ofron.
Skandalet me të vazhduan kur u hapën procedurat e tenderëve për uniformat apo për pajisje sigurie, të cilat do të merreshin me qera 4 vjeçare, do të paguheshin 1.6 milionë euro dhe do të ktheheshin përsëri!?
Një tjetër skandal ishte ofrimi i pakërkuar i shërbimit të sigurisë për ambientet e televizionit Ora News, të cilin po tentojnë t’a kontrollojnë me çdo kusht.
E mesa duket skandalet nuk do të pushojnë…
Dje, emisioni investigativ ”STOP”, ka denoncuar nëpërmjet një video regjistrimi, se rekrutimet në këtë strukturë, bëhen vetëm në mënyrë korruptive, duke paguar shefat e mëdhenj.
Duke paguar 500 mijë lekë të vjetra, në radhët e Illyrian Guard mund të punësohet kushdo dhe efektivët e Illyrian Guard mund të depërtojnë deri në zyrat më të larta të institucioneve të rëndësisë së veçantë.
Sa korrekt do jetë me ligjin një punonjës i Illyrian Guard, kur vendin e punës e ka fituar nëpërmjet korrupsionit?
Çfarë garancie i jep Edi Rama dhe Sandër Lleshaj qytetarëve për sigurinë e institucioneve, që shqiptarët i paguajnë nga xhepi i tyre?
Çfarë garancie i jepet punonjësve të këtyre institucioneve, që do të jenë të sigurtë në kryerjen e detyrave të tyre?
Illyrian Guard është pa dyshim policia private e Edi Ramës (jo se Policia e Shtetit nuk është), por Illyrian Guard do të sigurohet që asetet publike, institucionet dhe punonjësit e administratës, do t’i shërbejnë zellshëm Rilindjes në zgjedhjet e ardhshme”, shkruan Caka.
