TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Zyrtarë të lartë të Pentagonit, raportohet se po shqyrtojnë një propozim për të tërhequr deri në 10,000 trupa amerikane nga Evropa Lindore.
Sipas NBC News, ky propozim po shkakton shqetësim në SHBA dhe Evropë, pasi mendohet se mund të inkurajojë Rusinë e Vladimir Putinit që të ndërhyjë në Evropë.
Propozimi ka të bëjë me njësitë nga rreth 20,000 forcat që administrata Biden kishte vendosur në vitin 2022, pas pushtimit rus të Ukrainës, për të forcuar mbrojtjen e vendeve anëtare të NATO-s në kufi me vendin e shkatërruar nga lufta.
Megjithëse numrat janë ende duke u diskutuar, propozimi mund të përfshijë heqjen e deri në gjysmën e forcave të dërguara nga Biden.
Diskutimet e brendshme për reduktimin e nivelit të trupave amerikane në Rumani dhe Poloni vijnë në një kohë kur presidenti Donald Trump po përpiqet të bindë Putinin që të pajtohet me një armëpushim.
Të gjithë zyrtarët, të cilët folën për NBC News në kushte anonimiteti, zbuluan detaje të planit që nuk ishin bërë publike deri më tani.
Zyrtarët evropianë paralajmërojnë se nëse Pentagoni miraton propozimin, frika se SHBA po braktis aleatët e saj tradicionalë do të përforcohet. Siç theksojnë ata, Rusia mund ta perceptojë uljen e pranisë si një shenjë të mungesës së parandalimit, gjë që do të forcojë gatishmërinë e saj për të ndërhyrë në mënyra të ndryshme në Evropë.
“Rusët do ta vlerësojnë dobësimin e forcave amerikane si një dobësim të parandalimit dhe do të rrisin gatishmërinë e tyre për të ndërhyrë në mënyra të ndryshme në skenën evropiane”, tha Seth Jones, nënkryetar i Qendrës për Studime Strategjike dhe Ndërkombëtare.
Administrata Trump e ka bërë të qartë se dëshiron që aleatët evropianë të marrin më shumë përgjegjësi për mbrojtjen e tyre, në mënyrë që SHBA të mund ta zhvendosë peshën e saj ushtarake te Kina dhe prioritetet e tjera.
Sekretari i Mbrojtjes, Pete Hegseth, në udhëtimin e tij të parë jashtë vendit në shkurt, tha nga Brukseli se “realitetet e ashpra strategjike nuk i lejojnë Shtetet e Bashkuara të mbeten të përkushtuara ndaj sigurisë së Evropës. Në vend të kësaj, Uashingtoni do të fokusohet në sigurimin e kufijve të tij dhe përballjen me Kinën”, shtoi ai.
Në të njëjtën kohë, Elbridge Colby, i treti në hierarkinë e Pentagonit, ka mbrojtur publikisht lirimin e forcave nga Evropa në mënyrë që të vendoset theksi në Kinë.
Senatori republikan Roger Wicker, kryetar i Komitetit të Shërbimeve të Armatosura, shprehu publikisht skepticizëm rreth planit.
“Disa besojnë se tani është koha për të reduktuar në mënyrë drastike praninë tonë ushtarake në Evropë,” tha ai në një seancë dëgjimore të enjten, pa përmendur individë të veçantë. “Jam i shqetësuar nga këto pikëpamje thellësisht mashtruese dhe të rrezikshme të disa burokratëve në Ministrinë e Mbrojtjes”, shtoi ai, duke i akuzuar ata se kanë vepruar pa koordinim me ministrin e Mbrojtjes.
Shtëpia e Bardhë, përmes zëdhënësit të Këshillit të Sigurisë Kombëtare, Brian Hughes, deklaroi se “Presidenti po rishikon vazhdimisht zhvillimet dhe prioritetet për të siguruar që ai e vendos Amerikën në radhë të parë”.
Reduktimi gradual i gjurmës ushtarake amerikane në Evropë konsiderohet të jetë në gjendje të kursejë burime për prioritete të tjera, si zhvillimi i sistemeve të reja të armëve dhe zhvendosja e barrës drejt Azisë.
