TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Tensionet mes Shteteve të Bashkuara dhe Iranit janë përshkallëzuar sërish, pasi ushtria amerikane ndërmori sulme ndaj objektivave ushtarake iraniane në përgjigje të një sulmi me dron ndaj një anijeje tregtare në Gjirin Persik. Të dyja palët akuzojnë njëra-tjetrën për shkeljen e marrëveshjes së armëpushimit të arritur javën e kaluar. Komanda Qendrore e SHBA-së (CENTCOM) njoftoi se goditi depo raketash dhe dronësh, si edhe pozicione radarësh bregdetarë në Iran. Më vonë publikoi edhe pamje bardhezi të një prej goditjeve, ndërsa një zyrtar amerikan konfirmoi se operacioni kishte përfunduar.
Nga ana tjetër, Irani deklaroi se një raketë amerikane goditi zonën pranë portit të Shirikut, në jug të vendit, ndërsa marina iraniane u kundërpërgjigj duke sulmuar objektiva ushtarake amerikane në rajon. Teherani nuk dha detaje mbi objektivat e goditura, por paralajmëroi se çdo sulm i ri do të marrë një përgjigje edhe më të ashpër.
Presidenti amerikan Donald Trump fajësoi Iranin për sulmin ndaj anijes tregtare pranë brigjeve të Omanit, duke e cilësuar atë një shkelje të qartë të armëpushimit të përkohshëm. Në të njëjtën linjë, CENTCOM deklaroi se sulmet amerikane ishin “një përgjigje e fortë” ndaj agresionit iranian dhe theksoi se SHBA do të vazhdojë të garantojë lundrim të sigurt për anijet tregtare që kalojnë nëpër Ngushticën e Hormuzit. Edhe zëvendëspresidenti amerikan J.D. Vance reagoi ashpër përmes një postimi në rrjetin X.
“Irani nënshkroi marrëveshjen e armëpushimit. Ne e kemi respektuar atë. Nëse kanë mosmarrëveshje për mënyrën e zbatimit, mund të telefonojnë. Por dhuna do të përballet me dhunë”, deklaroi ai. Media shtetërore iraniane raportoi se në portin e Shirikut nuk janë shkaktuar dëme serioze dhe se aktiviteti vijon normalisht. Garda Revolucionare deklaroi se forcat e saj detare goditën bazat ku janë të dislokuara trupat amerikane në rajon dhe paralajmëroi se çdo agresion i ri do të marrë një përgjigje më të fortë.
Autoritetet iraniane këmbëngulin se kontrolli i trafikut detar në Ngushticën e Hormuzit u takon Iranit dhe Omanit, duke akuzuar Uashingtonin për provokime të vazhdueshme. Në mes të tensioneve në Gjirin Persik, u shënua edhe një zhvillim pozitiv në Lindjen e Mesme. Izraeli dhe Libani nënshkruan një marrëveshje për t’i dhënë fund armiqësive mes ushtrisë izraelite dhe Hezbollahut. Marrëveshja parashikon çarmatimin e Hezbollahut dhe tërheqjen graduale të trupave izraelite nga territori libanez, megjithëse mbetet e paqartë mënyra se si do të zbatohet, pasi Hezbollahu ka deklaruar se nuk do të bashkëpunojë.
Përpara zhvillimeve të fundit ushtarake, çmimet ndërkombëtare të naftës kishin rënë rreth 3%, ndërsa trafiku i tankerëve në Ngushticën e Hormuzit kishte nisur të normalizohej. Ndërkohë, kompania saudite Saudi Aramco rifilloi ngarkimin e naftës në terminalin Ras Tanura, porti më i madh i naftës në botë, pas një ndërprerjeje gati katërmujore. Sekretari amerikan i Shtetit, Marco Rubio, gjatë vizitës në vendet e Gjirit, u bëri thirrje të gjitha palëve të respektojnë lirinë e lundrimit në Ngushticën e Hormuzit dhe të shmangin çdo përpjekje për kontroll të njëanshëm të kësaj rruge strategjike.
